नागपूर : देश व समाजाच्या चांगल्या भविष्यासाठी भावी पिढीला जबाबदाऱ्या सोपवायला हव्यात. व्यवस्था सुरळीतपणे चालू लागल्या की जुन्या पिढीने बाजूला होऊन पुढील पिढीकडे जबाबदारी सोपवावी, असे मत केंद्रीय मंत्री नितीन गडकरी यांनी रविवारी व्यक्त केले. गडकरी यांच्या या वक्तव्याचे विविध अर्थ काढले जात आहेत.
नागपुरात आयोजित पत्रकार परिषदेत ते ‘अॅडव्हान्टेज विदर्भ–खासदार औद्योगिक महोत्सव’ संदर्भात बोलत होते. हा उपक्रम गडकरी यांच्या संकल्पनेतून साकारला असून, असोसिएशन फॉर इंडस्ट्रियल डेव्हलपमेंटचे अध्यक्ष आशिष काळे यांनी त्याचे आयोजन केले आहे.
गडकरी म्हणाले की, ‘अॅडव्हान्टेज विदर्भ’ या उपक्रमात काळे यांनी तरुण पिढीला सक्रियपणे सहभागी करून घेतले आहे. ‘माझा ठाम विश्वास आहे की हळूहळू पिढीबदल झाला पाहिजे. आशिष यांचे वडील माझे मित्र आहेत. आता आम्ही टप्प्याटप्प्याने निवृत्त व्हायला हवे आणि नव्या पिढीकडे जबाबदारी द्यायला हवी. वाहन एकदा सुरळीत चालू लागले की, आपण बाजूला होऊन इतर कामे करायला हवीत,’ असे गडकरी म्हणाले.
‘एआयडी’चे मुख्य मार्गदर्शक असलेल्या गडकरी यांनी सांगितले की, नागपुरात ६ ते ८ फेब्रुवारीदरम्यान होणारा ‘अॅडव्हान्टेज विदर्भ’ एक्स्पो यंदा तिसऱ्या वर्षात प्रवेश करत आहे. विदर्भात विविध क्षेत्रांत अतिशय सक्षम उद्योजक आहेत, असे नमूद करत गडकरी म्हणाले की, या तीन दिवसांच्या कार्यक्रमाचा उद्देश विदर्भाला भारताच्या औद्योगिक नकाशावर एक सक्षम आणि उदयोन्मुख विकासकेंद्र म्हणून स्थापित करणे हा आहे.
कोणत्याही प्रदेशाच्या विकासासाठी औद्योगिक क्षेत्र, शेती व संलग्न क्षेत्रे तसेच सेवा क्षेत्र यांचे महत्त्व अत्यंत मोलाचे असल्यावरही गडकरी यांनी भर दिला.
‘अॅडव्हान्टेज विदर्भ’ एक्स्पोत वस्त्रोद्योग, प्लास्टिक, खनिजे, कोळसा, विमानवाहतूक, लॉजिस्टिक्स, माहिती तंत्रज्ञान, आरोग्यसेवा, औषधनिर्मिती, संरक्षण, रिअल इस्टेट, नवीकरणीय ऊर्जा आणि स्टार्टअप्स अशा विविध क्षेत्रांतील उद्योगांचा सहभाग असणार आहे.
