कराड : सहसा पावसाळ्यात प्रवाहित होणाऱ्या ओझर्डे धबधबा यंदा मे महिन्यातच अचानक प्रवाहित झाला आहे. या अनपेक्षित घटनेमुळे परिसरातील निसर्गप्रेमींमध्ये आनंद पसरला असून पर्यटकांच्या कमी उपस्थितीमुळे या धबधब्याचा नैसर्गिक सौंदर्य काहीशा शांत वातावरणात पहायला मिळत आहे.
सामान्यतः ओझर्डे धबधबा जून-जुलै महिन्यात भरपूर पावसामुळे ओसंडून वाहतो. पण यंदा मे महिन्यातच या ठिकाणी पाण्याचा प्रवाह पाहायला मिळाल्याने स्थानिक लोक आणि काही पर्यटकांनी हा नवा अनुभव उत्साहाने टिपला आहे. स्थानिक हवामान तज्ज्ञांच्या मते, यंदा मे महिन्यात अचानक झालेल्या जोरदार अवकाळी पावसामुळे ओझर्डे धबधब्याचा प्रवाह वाढला आहे. या अनपेक्षित पावसामुळे निसर्गाच्या या अप्रतिम ठिकाणी एक वेगळे सौंदर्य आणि उत्साह उमटला आहे.
कोयनानगर परिसरातील रहिवाशांचे म्हणणे आहे की, पर्यटक कमी असल्यामुळे धबधब्याजवळची निसर्गरम्य शांतता टिकून राहिली आहे. हे निसर्गाचे वेगळे रुप अनुभवण्यासाठी एक सुवर्णसंधी आहे.
राज्य शासनाच्या पर्यटन विभागाच्यावतीने पर्यटनमंत्री शंभूराज देसाई यांच्या संकल्पनेतून ओझर्डे धबधब्याच्या परिसरात ‘स्काय वॉक’ हा बहुउद्देशीय प्रकल्प साकारण्यात येत आहे. या प्रकल्पामुळे पर्यटकांना धबधब्याचे मनमुराद सौंदर्य अनुभवता येणार असून, कोयनेच्या निसर्गाची महती जगभर पोहोचणार आहे. हा प्रकल्प पूर्ण झाल्यानंतर कोयनानगर पर्यटनाच्या नकाशावर ठळकपणे उठून दिसणार आहे.
भविष्यातील योजना
कोयनानगर पर्यटन विकास समितीने या ठिकाणच्या देखभालीसाठी आणि पर्यटक सुविधांसाठी पुढील काही महिन्यांत विशेष योजना राबविण्याचा मानस केला आहे. यात पर्यटकांसाठी आरोग्यदायी व आरामदायी सुविधा, मार्गदर्शन आणि स्वच्छता अभियानाचा समावेश असेल असा आशावाद शामा प्रसाद जनवन समितीचे अध्यक्ष महेश शेलार यांनी व्यक्त केला आहे.
