कराड : हिमालय पर्वत ओलांडून स्थलांतरित होणाऱ्या पक्षांपैकी 'पटेरी हंस' हा पक्षी हजारो किलोमीटर अंतर पार करून खटाव तालुक्यातील सूर्याचीवाडी येथील तलावामध्ये दाखल झाला आहे. हा 'पटेरी हंस' जगातील सर्वात जास्त उंच उडणाऱ्या पक्षांमधील एक पक्षी असून तशी त्याची नोंद आहे. पटेरी हंसाचे व फ्लेमिंगो पायलटचे (रोहित पक्ष्याची जोडी) सूर्याचीवाडी येथील तलावात आगमन झाले आहे. त्यामुळे सातारा जिल्ह्यातील पक्षीप्रेमींमध्ये पक्षी निरीक्षणांची नामी संधी प्राप्त झाल्याने त्यांच्यामध्ये आनंदाचे वातावरण निर्माण झाले आहे.
पटेरी हंस (बार-हेड हंस) याचे दक्षिण आशियातील पर्वतीय तलावात वास्तव्य असते. तो भारतात थंडीची चाहुल लागल्यानंतर स्थलांतरित होतो आणि मध्य आशियात प्रजनन करतो. हे घरट्यात एकावेळी तीन ते आठ अंडी देतात. हिमालय ओलांडताना स्थलांतर करणारा व जगातील सर्वात उंच उडणारा पक्षी म्हणून त्याला ओळखले जाते. हिमालय ओलांडण्यापूर्वी ही प्रजाती तिबेट, कझाकिस्तान, मंगोलिया आणि रशिया येथून दक्षिणेकडे गेल्याची नोंद आहे. पटेरी हंस (बार-हेड हंस) हिमालय पर्वतावर दक्षिण आशियाच्या काही भागात (आसाम ते तमिळनाडूच्या दक्षिणेस दक्षिण भागात) हिवाळा घालवण्यासाठी स्थलांतर करतात. हे पक्षी मुख्यत्वे तिबेट पठारावर घरटी करतात.
थंडी पडली असल्याने हे पटेरी हंस सुर्याचीवाडी तलावात दाखल झाले असून पक्षीप्रेमी, निसर्गप्रेमीमध्ये आनंदाचे वातावरण निर्माण झाले आहे. त्याचबरोबर फ्लेमिंगो उर्फ रोहित पक्षांचे आगमन झाले आहे. हजारो किलोमीटरचा प्रवास करून रोहित पक्षी सूर्याचीवाडी तलावात दाखल झाले आहेत. येत्या काही दिवसांतच हे पक्षी मायणी तलावात दाखल होतील. त्यामुळे खटाव तालुक्यासह परिसरातील पर्यटकांसाठी पक्षी पाहण्याची ही अनोखी संधी उपलब्ध झाली आहे.
करकोचा, तूतवार, तापस तुतारी हे पक्षीही दाखल झाले आहेत.
पटेरी हंस व अग्निपंखचे आगमन
मायणी पासून हाकेच्या अंतरावर असलेल्या सूर्याचीवाडी तलावात पटेरी हंस व अग्निपंखचे आगमन झाल्याने पक्षीप्रेमींचे तलावाच्या दिशेने पावले पडू लागली आहेत. गतवर्षाप्रमाणे याहीवर्षी पटेरी हंस व फ्लेमिंगोच्या आगमनामुळे निश्चितच खटाव तालुक्याच्या वैभवात पुन्हा भर पडणार आहे. सध्या मायणी, येरळवाडी व धोंडेवाडी येथील तलावात पाणी साठा उपलब्ध असल्याने हजारो किलोमीटरचा प्रवास करत फ्लेमिंगोने हजेरी लावली असून पक्षीप्रेमी व निसर्ग मित्रांना याचा आनंद घेता येणार आहे.
