पेण : गणेशमूर्तींवर विविध प्रकारची रंगसंगती आणि डिझाईन ज्यावेळी मूर्तिकार काढतो, त्यावेळी त्या मूर्तीला खऱ्‍या अर्थाने वेगळाच साज चढतो. या रंगसंगती आणि डोळ्यांच्या आखणीमुळे पेणच्या गणपतींना जगभरात विशेष मागणी आहे. यावर आकर्षित होऊन गणेशभक्त पेणचेच गणपती विकत घेण्यासाठी आग्रह धरत असतात. त्यातच आता गणेशमूर्तीला परिधान करण्यात येणारे खरेखुरे धोतर, शेला, फेटा आणि ज्वेलरीवर गणेशभक्त आकर्षित होत आहेत. यंदाचा गणेशोत्सव अवघ्या एका दिवसांवर येऊन ठेपल्याने मूर्तिकारांकडून बाप्पाच्या मूर्तीवर शेवटचा हात फिरविण्याची लगबग गणेश शाळांमध्ये दिसून येत आहे.
कोकणातील सणांपैकी महत्त्वाचा सण म्हणून ओळखल्या जाणाऱ्या गणेशोत्सवाला अवघा एक दिवस शिल्लक असल्याने गणेशोत्सवाची लगबग आता प्रत्येक गणेशभक्तांच्या घरामध्ये दिसू लागली आहे. गणेशभक्तांसाठी विविध प्रकारच्या मूर्ती देखील बाजारपेठेत काही दिवसांपूर्वीच विक्रीसाठी दाखल झालेल्या आहेत.
मूर्ती खरेदी करताना थोडे पैसे जास्त गेले तरी चालतील पण आम्हाला हिरेजडित मूर्तीच पाहिजे असा आग्रह आजकाल ग्राहकांकडून केला जात आहे. एवढेच नव्हे, तर कापडाचे धोतर लावणे, कानातील डूल, शेला, मोरपीस अशा विविध प्रकारच्या मूर्तीच्या सजावटीने नटलेले बाप्पा ग्राहकांच्या अधिक पसंतीस उतरत आहेत. यावर्षी अशा प्रकारच्या आत्तापर्यंत हजारो गणेशमूर्ती विकल्या गेलेल्या असून आजही या मूर्तींना मागणी वाढत आहे, परंतु आता उरलेला एक दिवस, वेळेचा अभाव आणि वाढती मागणी याची सांगड घालता येत नसल्याने ग्राहकाला दुखविण्याची इच्छा नसतानाही आम्ही त्यांना अशा प्रकारच्या मूर्ती देऊ शकत नाही, याची खंत पेण येथे गणेश मूर्तिकार विनय पाटील यांनी व्यक्त केली.
गणेशोत्सव दोन दिवसांवर आल्याने चित्रशाळांमध्ये बाप्पाच्या मूर्तीवर शेवटचा हात फिरविण्याची लगबग अंतिम टप्प्यात आहे. विविध प्रकारच्या देखण्या मूर्ती गणपती चित्रशाळांमध्ये तयार झाल्या आहेत. एकीकडे भातशेतीची गडबड सुरू असताना गणेशमूर्ती बनविण्याकडेही विशेष लक्ष दिले जाते.
पेणमधील गणपतीमूर्तींना तर जगाच्या कानाकोपऱ्यात विशेष मागणी असते.
यापूर्वी आम्ही रंगकामानेच मूर्तीचे दागिने, धोतर, शेला, फेटा आदी गोष्टी करायचो. मात्र हळूहळू आपल्या कलेला वेगळे वळण देऊन बाजारातून कापड खरेदी करून आणि नॉवेल्टीमधून ज्वेलरी खरेदी करून धोतर, शेला, फेटा, हिरे, मोती आणून ही बाप्पाची मूर्ती अधिक सुबक आणि देखणी करण्याचा प्रयत्न केला. हा प्रयत्न एवढा यशस्वी झाला की आता आमचे ग्राहक अशा प्रकारच्या मूर्तींचीच मागणी करू लागले आहेत. या वर्षीच पुढील वर्षीच्या मूर्तींची ऑर्डर ग्राहक देऊन जात असल्याने अशा प्रकारच्या मूर्तींना किती मागणी आहे हे स्पष्ट होते.
विनय पाटील, मूर्तिकार
जो बाप्पा आपल्याला आयुष्यभर मनापासून जे मागेल ते देत असतो, त्याची आपण मनोभावे पूजाअर्चा करत असतो, त्याच बाप्पाचे आगमन वर्षातून एकदा आपल्या घरी होत असेल तर त्यासाठी खर्चाचा विचार न करता आम्ही अधिकाधिक सुबक, देखण्या मूर्तीची मागणी मूर्तिकारांकडे करत असतो. मूर्तिकाराने बनवलेली खऱ्‍या कापडाचे धोतर, शेला, फेटा परिधान केलेली आणि खरे हिरेजडित मुकुट तयार केलेल्या मूर्तीला आम्ही अधिकाधिक पसंती देत आहोत.
अजय घरत, ग्राहक
