नांदेड : नांदेड लोकसभा मतदारसंघातील भाजपा उमेदवार प्रतापराव पाटील चिखलीकर यांच्या प्रचारासाठी केंद्रीय गृहमंत्री अमित शाह यांची जाहीर सभा गेल्या आठवड्यात पार पडल्यानंतर पंतप्रधान नरेंद्र मोदी यांची नांदेडमधील जाहीर सभा येत्या शनिवारी (दि. २०) होत असल्याची माहिती पक्षाच्या मध्यवर्ती निवडणूक कार्यालयातून देण्यात आली. त्यापाठोपाठ रविवारी (दि. २१) केंद्रीयमंत्री नितीन गडकरी यांची जाहीर सभा मुखेड येथे निश्चित झाली आहे. तसेच २० तारखेला नांदेडसोबतच परभणी येथेही मोदींची सभा ठेवण्याचे नियोजन सुरू झाले आहे.
निवडणूक प्रचाराच्या दुसऱ्या टप्प्यात भाजपा आणि मित्रपक्षांनी आपली यंत्रणा वाढवत शहरी आणि ग्रामीण भागात मेळावे, बैठका, सभा आणि लोकांशी संवाद या माध्यमांतून प्रचार सुरू ठेवला आहे. पक्षाचे स्टार प्रचारक अशोक चव्हाण यांनी शहराच्या वेगवेगळ्या प्रभागातील सभांनाही हजेरी लावण्याचे सत्र सुरू केले आहे. सोमवारी ते भोकर तालुक्यातील पिंपळढव जिल्हा परिषद गटाचा दौरा करणार आहेत, असे सांगण्यात आले.
