नागपूर : नागपुरात नीट परीक्षेच्या एका विद्यार्थिनीने केलेल्या आत्महत्येप्रकरणी तिने लिहिलेली 'सुसाईड नोट' (आत्महत्येची चिठ्ठी) केस पेपरला जोडली नसल्यामुळे एका पोलीस अधिकाऱ्याला कारणे दाखवा नोटीस बजावण्यात आली आहे, अशी माहिती एका वरिष्ठ अधिकाऱ्याने शनिवारी दिली.
"स्टेशन डायरीमध्ये सुसाईड नोटचा उल्लेख होता, मात्र ती केस पेपरला जोडलेली नव्हती," असे उपायुक्त (झोन २) नित्यानंद झा यांनी सांगितले. या दिरंगाईबद्दल अंबाझरी पोलीस ठाण्याचे तपास अधिकारी निखिल तांभाणे यांना कारणे दाखवा नोटीस बजावण्यात आल्याचे त्यांनी स्पष्ट केले.
दुसरीकडे, एका अन्य अधिकाऱ्याने सांगितले की, प्रकरणाशी संबंधित कोणत्याही कागदपत्रांमध्ये या सुसाईड नोटचा उल्लेख नव्हता. अगदी उपायुक्त झा यांनाही या चिठ्ठीच्या अस्तित्वाबद्दल माहिती दिली गेली नव्हती. मात्र, हे प्रकरण समोर आल्यानंतर वरिष्ठ पोलीस अधिकाऱ्यांनी चौकशी करून जबाबदारी निश्चित केली आणि आपला अहवाल उपायुक्तांकडे सादर केला.
मध्य प्रदेशातील रहिवासी असलेली १८ वर्षीय आकांक्षा चतुर्वेदी हिने ३ मे रोजी नीट यूजी परीक्षा दिली होती. परीक्षा दिल्यानंतर काही दिवसांनी २० मे रोजी तिने नागपुरात राहत्या घरी गळफास लावून आत्महत्या केली. नॅशनल टेस्टिंग एजन्सीने पेपर फुटीच्या आरोपांनंतर परीक्षा रद्द करून फेरपरीक्षा घेण्याचे आदेश दिले होते. यानंतर, "पुन्हा परीक्षा दिल्यास चांगले गुण मिळतीलच याची शाश्वती नाही," असे आकांक्षाने आपल्या भावूक सुसाईड नोटमध्ये नमूद केले होते.
कुटुंबियांना सापडली सुसाईड नोट मृत्यूच्या काही दिवसांनंतर, आकांक्षाचे कुटुंबिय तिची पुस्तके आणि अभ्यासाचे साहित्य तपासत असताना त्यांना ही हस्तलिखित चिठ्ठी सापडली. ती चिठ्ठी १ जून रोजी अंबाझरी पोलिसांकडे सोपवण्यात आली.
