पुणे : पुणे पदवीधर आणि शिक्षक मतदारसंघांच्या निवडणुकीतील उमेदवारी अर्ज मागे घेण्याची अंतिम मुदत शुक्रवारी संपली. त्यामुळे दोन्ही मतदारसंघांतील राजकीय लढतींचे चित्र स्पष्ट झाले आहे. पदवीधर मतदारसंघात महायुती विरुद्ध महाविकास आघाडी अशी थेट लढत होणार असून, शिक्षक मतदारसंघात अपक्ष उमेदवाराच्या सहभागामुळे तिरंगी सामना रंगणार आहे.
पुणे पदवीधर मतदारसंघात भाजपच्या डॉ. स्मिता योगेश जाधव आणि राष्ट्रवादी काँग्रेस शरदचंद्र पवार पक्षाच्या हर्षदा देशमुख-जाधव यांच्यात थेट लढत होणार आहे. राष्ट्रवादी काँग्रेसचे बंडखोर उमेदवार प्रताप ऊर्फ भैय्या माने यांनी अखेरच्या क्षणी माघार घेतल्याने पक्षांतर्गत बंडखोरी शमल्याचे चित्र आहे. त्यामुळे दोन प्रमुख महिला उमेदवारांमधील लढतीकडे लक्ष लागले आहे.
पुणे शिक्षक मतदारसंघात भाजपचे कौस्तुभ गावडे, काँग्रेसचे विद्यमान आमदार जयंत आसगावकर आणि अपक्ष उमेदवार सचिन सानप यांच्यात सामना होणार आहे. शिवसेना (शिंदे गट) कडून उमेदवारी मिळवण्यासाठी आग्रही असलेल्या सानप यांनी उमेदवारी न मिळाल्याने अपक्ष म्हणून निवडणूक लढवण्याचा निर्णय कायम ठेवला आहे.
पुणे, सातारा, सांगली, कोल्हापूर आणि सोलापूर या पाच जिल्ह्यांचा समावेश असलेल्या या निवडणुकीत उमेदवारांचे चित्र स्पष्ट झाले आहे. शिक्षक मतदारसंघातील अपक्ष उमेदवार सचिन सानप कोणाच्या मतांवर प्रभाव टाकतात, याकडे राजकीय वर्तुळाचे लक्ष लागले आहे.
चिवटेंना योग्य न्याय देणार
शिवसेनेचे मंगेश चिवटे आणि राष्ट्रवादी काँग्रेस शरदचंद्र पवार पक्षाच्या अश्विनी कदम यांनी अर्ज मागे घेतले. भाजप आणि शिवसेना (शिंदे गट) यांनी स्वतंत्र उमेदवार उभे केल्याने महायुतीसमोर पेच निर्माण झाला होता. मात्र, उपमुख्यमंत्री एकनाथ शिंदे यांच्या आदेशानंतर चिवटे यांनी माघार घेतली. शिवसेना नेते रवींद्र धंगेकर यांनी चिवटे यांनी पक्षाच्या निर्णयाचा आदर करून माघार घेतल्याचे सांगितले. तसेच, त्यांना योग्य न्याय देण्याबाबत एकनाथ शिंदे यांनी आश्वासन दिल्याची माहितीही त्यांनी दिली.
