पुणे: पुण्यात एका आरोपीच्या मैत्रिणीशी बोलल्याच्या वादातून, महाराष्ट्र लोकसेवा आयोगाच्या (एमपीएससी) परीक्षेची तयारी करणाऱ्या २८ वर्षीय तरुणाचे काही जणांनी अपहरण केल्याची माहिती पोलिसांनी गुरुवारी दिली.
गुरुवारी मध्यरात्रीनंतर या घटनेची माहिती मिळताच पोलिसांनी तात्काळ तपास सुरू करून पीडित तरुणाची सुटका केली आणि चार आरोपींपैकी दोघांना अटक केली.
स्थानिक हॉटेल मालक असलेल्या एका आरोपीच्या महिला मैत्रिणीशी बोलताना दिसल्यानंतर, आरोपींनी एमपीएससी परीक्षार्थी प्रसाद सूर्यवंशी याला मारहाण केली. त्यानंतर दोन सहकाऱ्यांच्या मदतीने आरोपींनी त्याचे एका वाहनातून अपहरण केले आणि त्याला सिंहगड रस्त्याच्या दिशेने घेऊन गेले, असे एका पोलीस अधिकाऱ्याने सांगितले.
पेरूगेट पोलीस चौकी परिसरातून एका कारमधून सूर्यवंशी यांचे अपहरण झाल्याचा फोन मध्यरात्री १२:३० च्या सुमारास पोलीस नियंत्रण कक्षाला आला. त्यानंतर पोलीस पथकाने त्या वाहनाचा पाठलाग करत सिंहगड रोडवर पीडित तरुणाची सुटका केली आणि दोन आरोपींना ताब्यात घेतले, असे त्यांनी स्पष्ट केले.
हा प्रकार एका मुलीशी बोलण्याच्या वादातून घडला, जी एका आरोपीची मैत्रीण आहे. या प्रकरणी दोन आरोपींना अटक करण्यात आली असून उर्वरित दोन आरोपींचा शोध सुरू आहे. पीडित मुलगा आणि ती मुलगी दोघेही एमपीएससीची तयारी करत आहेत,’ अशी माहिती विश्रामबाग पोलीस ठाण्याचे वरिष्ठ निरीक्षक नवनाथ जगताप यांनी दिली.
अटक करण्यात आलेल्या व्यक्तींची नावे सागर रमेश बोराडे आणि किशोर बाळासाहेब सावंत अशी आहेत. या प्रकरणी गुन्हा दाखल करण्यात आला असून फरार दोन आरोपींचा शोध घेतला जात आहे.
