पुणे : दिवाळीत फटाके उडविण्यावरून झालेल्या वादातून विमाननगर परिसरात तिघांनी एका २२ वर्षीय तरुणाला दांडक्याने बेदम मारहाण केली. या हल्ल्यात अमन शेख गंभीर जखमी झाला. याप्रकरणी विमानतळ पोलिसांनी खुनाच्या प्रयत्नाचा गुन्हा दाखल करून तिघांना अटक केली आहे.
राम नवले (१९), तेजस शिंदे (२०) आणि सम्यक साळवी (१८) अशी अटक केलेल्यांची नावे आहेत. विमाननगरमधील रोझ गार्डन सोसायटी रस्त्यावर अमन आणि त्याचे मित्र फटाके उडवत होते. त्याचवेळी जवळच फटाके उडविणाऱ्या दुसऱ्या गटाशी त्यांचा वाद झाला. या वादातून आरोपींनी अमनला दांडक्याने मारहाण केली. याप्रकरणी अमनचे वडील समीर शेख यांनी फिर्याद दिली आहे.
दरम्यान, गुरुवार पेठेतील पंचहौद मिशनजवळील भंडारी वाड्याला फटाक्यामुळे आग लागली. मोडकळीस आलेल्या या वाड्यात कोणीही राहत नव्हते. अरुंद गल्लीतील दाट वस्तीत असलेल्या वाड्याची संभाव्य पडझड लक्षात घेऊन वीजपुरवठाही खंडित करण्यात आला.