रत्नागिरी : तालुक्यातील कोळंबे येथे क्रिकेट खेळण्यासाठी कल्याणहून आलेल्या दोन अल्पवयीन मुलांचा डोहात बुडून मृत्यू झाल्याची दुर्दैवी घटना घडली. शुभम यादव आणि सौरभ झा अशी मृत मुलांची नावे असून, दोघेही १६ वर्षांखालील असल्याची माहिती मिळाली आहे.
कल्याण येथून एका क्रिकेट ॲकॅडमीचे सुमारे २० ते २२ मुले आणि दोन शिक्षक कोळंबे येथे सुरू असलेल्या १६ वर्षांखालील मुलांच्या क्रिकेट स्पर्धेसाठी आले होते. गुरूवारी दुपारी त्यांचा सामना संपल्यानंतर काही मुले मैदानालगत असलेल्या जंगलातील पाण्याच्या डोहात पोहण्यासाठी गेली.
यावेळी पाण्याचा अंदाज न आल्याने शुभम यादव आणि सौरभ झा हे दोघे खोल पाण्यात बुडाले. आरडाओरडा ऐकून स्थानिक नागरिक जमा झाले, पण त्यांनी मुलांना बाहेर काढेपर्यंत खूप उशीर झाला होता. त्यांना रुग्णालयात दाखल केले असता डॉक्टरांनी मृत घोषीत केले. दोघांना पाण्याबाहेर काढण्यात आले, तेव्हा त्यांच्या चेहऱ्यावर जखमा होत्या. डोहात उडी मारताना दगडावर आदळल्यामळे त्यांचा मृत्यू झाला असावा, असा प्राथमिक अंदाज व्यक्त केला जात आहे.
डोहाजवळ पोहण्यासाठी जाऊ नये, याबाबत स्थानिक ग्रामस्थांनी सूचना फलक लावले आहेत. तसेच या ठिकाणी मोठ्या प्रमाणात दगड असल्याने नागरिकही या परिसरात जाणे टाळतात. मात्र, सूचनांकडे दुर्लक्ष करून मुले डोहात उतरल्याचे सांगण्यात येत आहे. पर्यटनस्थळी किंवा अनोळखी जलस्रोतांवर जाताना स्थानिकांच्या सूचनांकडे गांभीर्याने लक्ष देणे आवश्यक असल्याचे ग्रामस्थांनी सांगितले. पोलिस घटनेचा अधिक तपास करत आहेत.
