विटा : मंत्रिमंडळ बैठकीतील घडामोडींनंतर उपमुख्यमंत्री एकनाथ शिंदे यांनी दिल्लीदरबारी जाऊन केंद्रीय गृहमंत्री अमित शहा यांच्याकडे तक्रार केल्यानंतर महायुतीतील संबंध आणखी ताणले गेले होते. त्यातच शिंदे गटाचे आमदार निलेश राणे यांनी भाजप कार्यकर्त्याच्या घरी धाड टाकून रोख रक्कम पकडल्यानंतर भाजपचे प्रदेशाध्यक्ष रवींद्र चव्हाण यांनी भाजप-शिवसेना युती २ डिसेंबरपर्यंत टिकवायची असल्याचे वक्तव्य केले होते. त्यात त्यांनी पुन्हा एकदा 'देवाभाऊच सबकुछ', देवाभाऊ हाच सबका भाऊ, दोन नंबर तो दोन नंबरच असतो, नंबर दोनला काही किंमत नसते, असे वक्तव्य केले, त्यावरून महायुतीत चांगलेच बिनसले असल्याची चर्चा सध्या राजकीय वर्तुळात सुरू आहे.
विटा नगरपरिषदेच्या प्रचारसभेत रवींद्र चव्हाण यांनी माजी गृहमंत्री स्व. आर. आर. पाटील यांच्या भाषणातील वक्तव्याची आठवण काढली. "आर. आर. पाटील आपल्या भाषणात म्हणाले होते की, मी काँग्रेस आणि राष्ट्रवादी या आघाडीत बरेच वर्ष काम केले. मी मोठमोठी पदे भूषवली आणि नंबर एक होण्याचा प्रयत्न केला. पण नंबर एक होऊ शकलो नाही, कायम नंबर दोनच राहिलो. कारण नंबर एक हा नंबर एकच असतो. नंबर दोनला काही किंमत नसते," असे रवींद्र चव्हाण म्हणाले.
"जो भी है देवाभाऊही है, देवाभाऊ सबका भाऊ, दोन नंबर तो दोन नंबरच असतो, नंबर दोनला काही किंमत नसते," असे वक्तव्य चव्हाण यांनी केल्याने त्यांचा नेमका रोख कोणाकडे आहे, याबाबत उलटसुलट चर्चेला उधाण आले आहे. त्यामुळे दोन्ही पक्षांमध्ये सारेकाही आलबेल नसल्याचे संकेत मिळत आहेत.
भाजप आणि एकनाथ शिंदेंची शिवसेना राज्यात सत्तेत एकत्र असले तरी नगरपरिषद आणि नगरपंचायत निवडणुकीच्या निमित्ताने दोन्ही पक्ष एकमेकांसमोर आले असून कोकणात तर या दोन्ही पक्षातील वाद विकोपाला गेला आहे.
"काल एकनाथ शिंदे यांची सभा येथे झाली, त्या सभेमध्ये काय बोलले गेले, कसे बोलले गेले याची माहिती मिळाली. पण मी एकच गोष्ट सांगेन की, जे काही आहे ते सर्व देवाभाऊच आहे. सगळ्या बहिणींचाही भाऊ आणि इतरांचाही भाऊ," असे म्हणत भाजपचे प्रदेशाध्यक्ष रवींद्र चव्हाण यांनी पुन्हा एकदा उपमुख्यमंत्री एकनाथ शिंदे यांना जाहीररित्या डिवचले आहे.
निलेश राणेंनी केलेल्या स्टिंग ऑपरेशनवर रवींद्र चव्हाण म्हणाले की, "मला २ डिसेंबरपर्यंत युती टिकवायची आहे. त्यानंतर मी निलेश राणेंना उत्तर देईन. आत्ता मी काहीही बोलणार नाही. नंतर उत्तर देईन. निलेश राणे जे बोलत आहेत, ते खोटे आहे."
आमच्याकडे नीती, नियती आणि निधीही आहे - फडणवीस
आपण प्रचारसभेत विरोधकांवर टीका करत नाही. आम्ही सकारात्मक विचार घेऊन आलोय. आम्ही एक विकास आराखडा घेऊन जनतेपुढे जात आहोत. आपल्याकडे नीती, नियत आणि निधीही आहे. छोट्या शहरांमध्ये जर आपण निधी दिला तर आपण या शहरांचा चेहरा बदलू शकतो. शहरामध्ये संधी असल्यामुळे गावातले लोक शहराकडे जातात. पण नियोजन नसल्यामुळे शहरांची अवस्था बिकट झाली आहे. मोदीजींनी पहिल्यांदा देशातल्या शहरांसाठी विविध योजना सुरू केला, त्या योजनांच्या माध्यमातून लाखो कोटी रुपये शहरांच्या विकासासाठी मोदीजींनी दिलेत. शहरातील घरांचे पट्टे आम्ही देणार आहोत, म्हणजे त्यांचा विकास करता येईल, असे मुख्यमंत्री देवेंद्र फडणवीस यांनी सांगितले.
भाजपने युती धर्म पाळलाच पाहिजे - एकनाथ शिंदे
मुंबई : भाजपने युती धर्माचे पालन केले पाहिजे. तो न पाळल्यास संघर्ष होईल, असे स्पष्ट प्रतिपादन उपमुख्यमंत्री एकनाथ शिंदे यांनी केल्यानंतर महायुतीतील मतभेद शनिवारी उघडपणे समोर आले. भाजपने सहयोगी पक्षाचे काही नेते घेतल्याने तणाव निर्माण झाला आहे. त्या पार्श्वभूमीवर शिंदे यांचे वक्तव्य महत्त्वपूर्ण मानले जात आहे. शिंदे म्हणाले की, त्यांचा पक्ष 'युती धर्म' पाळतो. त्याचप्रमाणे भाजपनेही तसेच केले पाहिजे. युती धर्म न पाळल्यास संघर्ष होईल, असेही त्यांनी स्पष्ट केले. शिंदे म्हणाले की, मुख्यमंत्री फडणवीस यांच्यासोबत झालेल्या बैठकीत फोडाफोडी होणार नाही, असे ठरले असून प्रकरण मिटल्यासारखे वाटत आहे. मुंबई आणि ठाण्यात शिवसेना हा 'मोठा भाऊ' असल्याचे त्यांनी अधोरेखित केले. 'मुंबईत १२० माजी नगरसेवक शिवसेनेत दाखल झाले आहेत,' असे सांगत त्यांच्या पक्षाचा तितक्या जागांवर लढण्याचा मानस स्पष्ट केला.
