मुंबई : उन्हाळी सुट्टीनंतर राज्यातील शाळांची घंटा सोमवारपासून पुन्हा वाजणार आहे. २०२६-२७ या शैक्षणिक वर्षाची आता सुरुवात होत आहे.
मुंबई मनपाच्या वतीने चालवल्या जाणाऱ्या सर्व शाळा सोमवार, १५ जून रोजी पुन्हा सुरू होणार आहेत. शासकीय आणि स्थानिक स्वराज्य संस्थांच्या शाळांमध्ये विद्यार्थ्यांचे स्वागत करणे आणि पटसंख्या (नावनोंदणी) वाढवणे या उद्देशाने राज्यव्यापी उपक्रमाचा भाग म्हणून सर्व पालिका शाळांमध्ये विशेष ‘शाळा प्रवेशोत्सव’ कार्यक्रमांचे आयोजन करण्यात आले आहे. दरम्यान, शाळा सुरू होणार असल्याने पालकांनी शालेय वस्तूंच्या खरेदीसाठी रविवारी मोठी गर्दी केली होती.
राज्यपाल जिष्णू देव वर्मा सोमवारी सकाळी ११ वाजता भायखळा (पूर्व) येथील घोडपदेव येथील बीएमसी शाळा संकुलातील 'मुंबई पब्लिक स्कूल'मध्ये आयोजित प्रवेशोत्सव कार्यक्रमाला भेट देणार आहेत. या कार्यक्रमाला उपमहापौर संजय घाडी, शिक्षण समिती अध्यक्षा राजेश्री शिरवडकर, महानगरपालिका आयुक्त अश्विनी भिडे, अतिरिक्त महानगरपालिका आयुक्त डॉ. अविनाश ढाकणे, स्थानिक नगरसेवक रमाकांत रहाटे आणि उपआयुक्त (शिक्षण) डॉ. प्राची जांभेकर उपस्थित राहणार आहेत.
विदर्भ वगळता, १५ जून रोजी महाराष्ट्रात ‘शाळा प्रवेशोत्सव २०२६’ साजरा केला जाईल. प्रत्येक मुलाला शिक्षणाच्या मुख्य प्रवाहात आणणे, शासकीय आणि स्थानिक स्वराज्य संस्थांच्या शाळांमधील पटसंख्या वाढवणे आणि शाळेचा पहिला दिवस एका संस्मरणीय आणि उत्सवाच्या प्रसंगात बदलणे, हा या उपक्रमाचा मुख्य उद्देश आहे.
