नवी दिल्ली : आर्थिक वर्ष २०२५-२६ साठी निवडणूक आयोगाला सादर केलेल्या अहवालानुसार, एकनाथ शिंदे यांच्या शिवसेनेला सुमारे १३९.९२ कोटी रुपयांचा निधी मिळाला. याउलट, उद्धव ठाकरे यांच्या शिवसेना (उबाठा) पक्षाला सुमारे १.२५ कोटी रुपये आणि राज ठाकरे यांच्या महाराष्ट्र नवनिर्माण सेनेला सुमारे १.५० कोटी रुपयांचा निधी मिळाला आहे.
या आकडेवारीनुसार, शिंदे यांच्या पक्षाला उद्धव यांच्या पक्षापेक्षा सुमारे ११२ पट आणि राज ठाकरे यांच्या पक्षापेक्षा सुमारे ९३ पट अधिक निधी मिळाला आहे. तथापि, दोन्ही ठाकरे बंधूंच्या पक्षांना मिळालेला निधी एकत्र केल्यास तो सुमारे २.७५ कोटी रुपये होतो. या हिशोबाने, शिंदे यांच्या पक्षाला दोघांच्या एकूण निधीच्या तुलनेत सुमारे ५१ पट अधिक रक्कम मिळाली आहे. ही माहिती तिन्ही पक्षांनी ‘फॉर्म-२४ए’ अंतर्गत दिलेल्या आकडेवारीवरून समोर आली आहे. निवडणूक आयोगाला सादर केल्या जाणाऱ्या फॉर्म-२४ए अहवालात सामान्यतः २०,००० रुपयांपेक्षा अधिकच्या देणग्यांचा तपशील दिला जातो.
शिंदेंच्या शिवसेनेला कोणाकडून सर्वाधिक निधी
पक्षाने निवडणूक आयोगाला दिलेल्या तपशिलानुसार, एकनाथ शिंदे यांच्या शिवसेनेला मिळालेल्या मोठ्या देणग्यांमध्ये कन्स्ट्रक्शन आणि इन्फ्रास्ट्रक्चर क्षेत्रातील कंपन्यांचा समावेश आहे. या तीन मोठ्या देणग्यांची एकूण बेरीज ७५ कोटी रुपये आहे. म्हणजेच, शिंदेंच्या शिवसेनेला मिळालेल्या सुमारे १३९.९२ कोटी रुपयांच्या एकूण घोषित निधीपैकी जवळपास ५३.६ टक्के हिस्सा या तीन देणग्यांमधून आला आहे. उर्वरित रक्कमेमध्ये इतर कंपन्या आणि दात्यांच्या योगदानाचा समावेश आहे. पक्षाच्या अहवालात 'एचओएबीएल मॅनेजमेंट', 'एसबी इन्फोकैश' आणि रिअल इस्टेट क्षेत्राशी संबंधित इतर कंपन्यांची नावेही नमूद करण्यात आली आहेत. अहवालात निधी स्वीकारण्यासाठी चेक, डिमांड ड्राफ्ट आणि आरटीजीएस यांसारख्या माध्यमांचा उल्लेख करण्यात आला आहे.
उद्धव, राज यांच्या पक्षांना कोणाकडून मिळाला निधी
उद्धव ठाकरे यांच्या शिवसेना (उबाठा) पक्षाला सुमारे १.२५ कोटी रुपयांचा निधी मिळाला. पक्षाने दाखल केलेल्या तपशीलामध्ये 'ज्युनिपर होटल्स' (ग्रँड हयात), 'अजिमा मॅनॉर प्रायव्हेट लिमिटेड' आणि 'म्युच्युअल ग्रोथ फंड' यांसारख्या नावांचा समावेश आहे. दुसरीकडे, राज ठाकरे यांच्या महाराष्ट्र नवनिर्माण सेनेने १,४९,८१,००० रुपये (म्हणजेच सुमारे १.५० कोटी रुपये) निधी मिळाल्याचे घोषित केले आहे. त्यांच्या अहवालात 'सारस्वत कन्स्ट्रक्शन', 'पायोनियर हाऊसिंग' तसेच स्थानिक संस्था आणि समर्थकांकडून मिळालेल्या योगदानाचा उल्लेख आहे.