सिंधुदुर्ग : सिंधुदुर्ग येथील शासकीय वैद्यकीय महाविद्यालयातील ११८ प्रशिक्षित डॉक्टरांचे गेल्या दोन महिन्यांपासून वेतन थकल्याने त्यांच्यावर आर्थिक संकट ओढवले आहे. वेतनाअभावी घरभाडे भरणे आणि जेवणाची व्यवस्था करणेही कठीण झाल्याने संतप्त डॉक्टरांनी महाविद्यालयासमोर कामबंद आंदोलन केले. अखेर अधिष्ठाता डॉ. अमोल शिंदे यांनी मध्यस्थी करून थकीत वेतन लवकर देण्याचे आश्वासन दिल्यानंतर डॉक्टरांनी आंदोलन मागे घेतले. या आंदोलनामुळे रुग्णालयातील रुग्णसेवेवर परिणाम झाला.
सिंधुदुर्गनगरी येथील शासकीय वैद्यकीय महाविद्यालयात हे डॉक्टर १२ ते २४ तास रुग्णसेवा देतात. शासनाच्या वतीने 'जेम्स मॅक्स' या संस्थेमार्फत त्यांना वेतन दिले जाते. मात्र, दोन महिन्यांपासून वेतन न मिळाल्याने रुग्णालय परिसरात राहणाऱ्या डॉक्टरांना घरभाडे आणि जेवणाचा खर्च भागवताना अडचणी येत आहेत. मेस चालकाचेही पैसे थकल्याने जेवण मिळणे कठीण झाल्याचे डॉक्टरांनी सांगितले.
राज्यातील अन्य वैद्यकीय महाविद्यालयांतील प्रशिक्षित डॉक्टरांना नियमित वेतन मिळत असताना सिंधुदुर्गातील डॉक्टरांवरच अन्याय का, असा सवाल त्यांनी उपस्थित केला. भविष्यात वेतन वेळेवर न मिळाल्यास बेमुदत आंदोलन करण्याचा इशाराही त्यांनी दिला.
दरम्यान, महाविद्यालयातील वर्ग ३ आणि वर्ग ४ कर्मचाऱ्यांचेही वेतन थकल्याने त्यांनी कामबंद आंदोलनाचा इशारा दिला आहे. 'स्मार्ट सर्व्हिसेस प्रा. लि.'च्या माध्यमातून कार्यरत कर्मचाऱ्यांनी २२ ऑक्टोबर २०२६ रोजी अधिष्ठात्यांना निवेदन दिले.
स्थानिक कर्मचाऱ्यांची आर्थिक पिळवणूक
वेतनाअभावी घरखर्च, मुलांचे शिक्षण, औषधोपचार आणि बँकेचे हप्ते भरण्यात अडचणी येत असल्याचे कर्मचाऱ्यांनी निवेदनात नमूद केले आहे. थकीत वेतन तातडीने अदा करावे आणि वेतन देण्याबाबत निश्चित कालमर्यादेसह लेखी आश्वासन द्यावे, अशी मागणी त्यांनी केली आहे. याप्रकरणी जिल्हा परिषद सदस्य रुपेश पावसकर यांनी रुग्णालय प्रशासनाशी चर्चा करून कंत्राटी कर्मचाऱ्यांची बाजू मांडली. स्थानिक कर्मचाऱ्यांची आर्थिक पिळवणूक करू नये, असे त्यांनी सांगितले. वेतनाचा प्रश्न लवकर न सुटल्यास आंदोलन करण्याची भूमिका कर्मचाऱ्यांनी घेतली आहे.
