पुणे : मतदार यादीच्या विशेष सखोल पुनरीक्षणाच्या (एसआयआर) प्रक्रियेला आणि निवडणूक आयोगाच्या भूमिकेला विरोध करण्यासाठी पुण्यात शनिवारी आंदोलन करण्यात आले. लाल महाल चौक आणि शनिवारवाडा परिसरात जमलेल्या सीजेपीच्या ८८ आंदोलकांना पोलिसांनी ताब्यात घेतल्याने परिसरात तणावाचे वातावरण निर्माण झाले. ताब्यात घेतलेल्या आंदोलकांना लष्कर पोलीस ठाण्यात नेण्यात आले. तेथे विद्यार्थ्यांनी आंदोलन सुरू केले, तर पोलीस ठाण्याबाहेर समर्थकांनी घोषणाबाजी करत निषेध नोंदवला.
पोलिसांच्या माहितीनुसार, एसआयआर प्रक्रिया आणि निवडणूक आयोगाच्या विरोधात शनिवारवाडा ते जिल्हाधिकारी कार्यालय अशी रॅली काढण्यासाठी काही संघटनांनी परवानगी मागितली होती. मात्र, कायदा-सुव्यवस्थेचा प्रश्न निर्माण होण्याची शक्यता लक्षात घेऊन पोलिसांनी परवानगी नाकारली होती. तरीही शनिवारी दुपारी काही आंदोलक शनिवारवाडा परिसरात रस्त्यावर जमले. त्यामुळे वाहतुकीला अडथळा निर्माण झाल्याचे सांगत पोलिसांनी ८८ आंदोलकांना ताब्यात घेतले.
या कारवाईची माहिती मिळताच आंदोलकांचे समर्थक पोलीस ठाण्याबाहेर जमा झाले. दरम्यान, ताब्यात घेतलेल्या काही युवकांचे पालकही पोलीस ठाण्यात दाखल झाले. संबंधित युवकांना पालकांच्या स्वाधीन करण्याची प्रक्रिया सुरू असल्याचे पोलिसांनी सांगितले.
