नागपूर : राज्याचे माजी गृहमंत्री आणि महाविकास आघाडीचे प्रमुख नेते अनिल देशमुख यांच्या गाडीवर दगडफेक करण्यात आली असून त्यांच्या डोक्याला जबर मार बसला आहे. या हल्ल्यात अनिल देशमुख गंभीर जखमी झाले असून त्यांना काटोलमधील रुग्णालयात दाखल करण्यात आले आहे. काटोल-जलालखेड मार्गावरील बेलफाट्याजवळ काही व्यक्तींकडून ही दगडफेक करण्यात आली.
सोमवारी संध्याकाळी काटोल विधानसभा मतदारसंघामधील नरखेड येथील सांगता सभा आटोपल्यानंतर अनिल देशमुख तीनखेडा भिष्णूर मार्गाने परत येत होते. बेलफाट्याजवळील गतिरोधकावर, त्यांच्या कारची गती कमी झाली. त्याचा फायदा घेत, तोंडाला कापड बांधलेले तीन चार जण तेथे आले. त्यांनी कारवर दगडफेक केली. यात देशमुख यांच्या डोक्याला मार लागला. हा हल्ला होताच, देशमुख यांच्या कारमागे असलेल्या अन्य कारमधील कार्यकर्ते कारमधून बाहेर आले. त्यांना बघताच दगडफेक करणारे शेतातून पसार झाले. अनिल देशमुख यांनी मात्र भाजपच्या कार्यकर्त्यांनी हा हल्ला केला, असा आरोप केला आहे.
