मुंबई : महाराष्ट्र राज्य विनाअनुदानित शाळा कृती समितीने पुकारलेले बेमुदत आंदोलन अखेर तात्पुरते स्थगित केले आहे. समितीच्या मागण्यांबाबत शिक्षण मंत्र्यांनी ठोस आश्वासन दिल्याने आंदोलन मागे घेण्याचा निर्णय घेण्यात आला आहे. सरकारने दिलेले आश्वासन न पाळल्यास पुन्हा तीव्र आंदोलन करण्यात येईल, असा इशारा कृती समितीने दिला आहे.
प्रचलित नियमानुसार अनुदान मिळावे व इतर मागणीसाठी महाराष्ट्र राज्य विनाअनुदानित शाळा कृती समितीच्या वतीने २७ जून पासून आझाद मैदानात शिक्षक, मुख्याध्यापकांनी आंदोलन सुरू केले होते. कृती समितीच्या शिष्टमंडळास शिक्षण मंत्री दीपक केसरकर यांनी शनिवारी भेटीस बोलावले. या बैठकीमध्ये अनुदानाच्या टप्पा वाढीचा प्रस्ताव मंजुरीसाठी मंत्रिमंडळ बैठकीसाठी पाठविण्यात आला आहे. येत्या मंत्रिमंडळ बैठकीत अनुदानाचा प्रश्न मार्गी लागेल. तसेच प्रत्येक वर्षी अनुदानाचा पुढील टप्पा वाढ मिळेल. त्याचप्रमाणे अघोषित शाळांचा निर्णय घेण्यात येईल, असे आश्वासन शिक्षण मंत्र्यांनी शिष्टमंडळाला दिले.
शिक्षणमंत्री मंत्री व आमदार ज्ञानेश्वर म्हात्रे यांनी केलेल्या विनंतीनुसार कृती समितीने हे आंदोलन तात्पुरते स्थगित केले असल्याचे समिती मुंबई अध्यक्ष संजय डावरे यांनी सांगितले. सरकारने दिलेले आश्वासन न पाळल्यास पुन्हा तीव्र आंदोलन करण्याचा इशारा समितीने दिला आहे. या शिष्टमंडळात खंडेराव जगदाळे, पुंडलिक रहाटे, संजय डावरे, भारत जामानिक, संजय रंगारी यांच्यासह मुख्याध्यापक आणि शिक्षक उपस्थित होते.
