राज्यात पुन्हा एकदा कोरोनाबाधित रुग्णांची संख्या वाढत आहे. कोरोना रुग्णांच्या वाढत्या संख्येमुळे भीती वाढली आहे. या पार्श्वभूमीवर राज्य सरकार सतर्क झाले आहे. दुबई आणि चीनमधून येणाऱ्या प्रवाशांची कोरोना चाचणी करावी, अशी सूचना महाराष्ट्राच्या कोविड टास्क फोर्सने केली आहे. राज्याच्या सार्वजनिक आरोग्य विभागाच्या सचिवांच्या अध्यक्षतेखाली झालेल्या बैठकीत टास्क फोर्सने ही सूचना केली. गेल्या काही दिवसांपासून चीन आणि दुबईहून येणाऱ्या प्रवाशांची कोरोना चाचणी पॉझिटिव्ह आढळून आली आहे. त्यामुळे दोन्ही ठिकाणांहून येणाऱ्या व्यक्तीची कोरोना चाचणी करावी, अशी सूचना टास्क फोर्सने राज्य सरकारला केली आहे.
विमान कंपन्यांशी चर्चा करून चाचणीबाबत निर्णय घेण्याच्या सूचना राज्य सरकारने दिल्या आहेत. सध्या परदेशातून येणाऱ्या प्रवाशांपैकी दोन टक्के प्रवाशांची विमानतळावर तपासणी केली जात आहे. पॉझिटिव्ह आलेल्या सर्वांचे नमुने जिनोम सिक्वेन्सिंगसाठी पाठवले जात आहेत. दुसरीकडे मुंबई महापालिकेने प्रतिबंधात्मक उपाययोजनांच्या तयारीचा वेग वाढवला आहे. शहरातील दोन रुग्णालयांसह तीन ठिकाणी जम्बो कोरोना सेंटर सुरू करण्याचा निर्णय महापालिकेने घेतला आहे. या केंद्रात रक्त शुद्धीकरण केंद्र, शस्त्रक्रिया कक्ष, लहान मुलांसाठी अतिदक्षता विभाग अशा सुविधा उपलब्ध करून देण्यात येणार आहेत. राज्यातील मुंबई, पुणे आणि नागपूर आंतरराष्ट्रीय विमानतळांवर २४ डिसेंबरपासून प्रवाशांचे सर्वेक्षण सुरू आहे.
राज्यात सध्या कोरोनाचे 3090 सक्रिय रुग्ण आहेत. यापैकी मुंबईत सर्वाधिक 937 सक्रिय रुग्ण आहेत. पुण्याचा क्रमांक त्यापेक्षा खाली आहे आणि पुण्यात 726 सक्रिय रुग्ण आढळले आहेत. ठाण्यात 566 सक्रिय रुग्ण आहेत. सलग दुसऱ्या दिवशी देशभरात तीन हजारांहून अधिक कोरोना बाधित रुग्णांची नोंद झाली आहे. गेल्या २४ तासांत देशभरात ३ हजार ९५ रुग्ण आढळले आहेत. गेल्या सहा महिन्यांतील रुग्णांची ही विक्रमी संख्या आहे. चाचण्यांच्या संख्येनुसार, कोरोना संसर्गाचा दर 1.71 वरून 1.91 वर गेला आहे.
