नाशिकमध्ये मकर संक्रांतीच्या पूर्वसंध्येलाच एका कुटुंबावर दु:खाचा आहे. विजेच्या तारांमध्ये अडकलेली पतंग स्टीलच्या रॉडचा वापर करुन काढण्याचा प्रयत्न करताना एका दहावीत शिकणाऱ्या मुलाला आपला जीव गमवावा लागला. भाग्येश विजय वाघ असे या 15 वर्षीय मृत मुलाचे नाव आहे. नाशिकमधील पाथर्डी फाटा परिसरातील साईराम रो हाऊसजवळ रविवारी दुपारी साडेतीन वाजेच्या सुमारास ही दुर्दैवी घटना घडली. या घटनेने भाग्येशच्या कुटुंबावर शोककळा पसरली असून परिसरातदेखील हळहळ व्यक्त केली जात आहे.
मिळालेल्या माहितीनुसार, रविवारी मुलांचा एक ग्रुप पतंग उडवण्यात मग्न होता. यावेळी त्यांच्यातील भाग्येश अडकलेले पतंग एका स्टीलच्या रॉडच्या सहाय्याने काढत असताना त्याला विजेचा धक्का बसला आणि तो बेशुद्ध पडला. यानंतर परिसरातील नागरिकांनी भाग्येशला तात्काळ उपचारासाठी जवळच्या खासगी रुग्णालयात दाखल केले. त्यानंतर त्याच्या वडिलांनी त्याला जिल्हा शासकीय रुग्णालयात हलवले. मात्र, शासकीय रुग्णालयातील डॉक्टरांनी तपासून त्याला मृत घोषित केले. या प्रकरणी इंदिरा नगर पोलीस ठाण्यात अकस्मात मृत्यूची नोंद करण्यात आली आहे.
दरम्यान, पतंगाच्या मांजामुळे पक्षी, प्राणी व मानवी जिवीतास धोका निर्माण होतो. पक्षी, प्राणी, नागरिक, बालके, वयोवृद्ध, वाहनस्वार जखमी होण्याचे अथवा प्राण गमाविण्याच्या घटना याआधी घडल्या आहेत. तुटलेला मांजा विजेच्या तांरामध्ये अडकून काही ठिकाणी आगी देखील लागण्याच्या घटना घडलेल्या आहेत. या पार्श्वभूमीवर नाशिक पोलिसांकडून 23 जानेवारीपर्यंत नायलॉन मांज्याची विक्री व वापरावर मनाई आदेश जारी करण्यात आला आहे.
