पुणे : प्रसिद्ध शिवगर्जना ढोल-ताशा पथकाने यंदाच्या गणेशोत्सवात एक अनोखा सामाजिक संदेश देत महिलांच्या सुरक्षेचा मुद्दा उचलला आहे. महिलांच्या सहभागासाठी ओळखले जाणारे हे पथक, त्यांच्या मिरवणुकीत महिलांच्या सुरक्षेचा जागर करत असल्याचे चित्र पहावयास मिळाले. तुळशीबाग गणपती आगमन सोहळा २०२४ मध्ये त्यांनी महिलांच्या सुरक्षेसाठी विविध संदेश असलेले फलक आणि बॅनर्स हातात धरले आणि समाजाला जागरूक करण्यासाठी एक प्रभावी पाऊल उचलल्याचे दिसून आले.
शिवगर्जना पथक हे फक्त ढोल-ताशाच्या गजरापुरते मर्यादित नाही, तर सामाजिक प्रश्नांवर देखील लक्ष केंद्रित करत आहे. ललित पवार यांच्या नेतृत्वाखाली या पथकाने पुरुष आणि महिलांच्या समान सहभागाला प्रोत्साहन दिले आहे. त्यांच्या मिरवणुकीत महिलांसोबत काम करणे हे त्यांचे वैशिष्ट्य आहे. यंदाच्या मिरवणुकीत मात्र त्यांनी महिलांच्या सुरक्षेचा मुद्दा हिरिरीने उचलला.
ललित पवार यांनी सांगितले, शिवगर्जना पथकाची स्थापना फक्त ढोल-ताशा वादनासाठीच नाही तर समाजात पुरुष आणि महिलांच्या समान सहभागाला प्रोत्साहन देण्यासाठी झाली आहे. सध्या महिलांवरील वाढत्या अत्याचाराच्या घटनांनी आम्हाला अस्वस्थ केले आहे आणि या समस्येवर लक्ष वेधण्यासाठी गणेशोत्सवासारख्या मोठ्या व्यासपीठाचा वापर करण्याचे ठरवले आहे.
शिवगर्जना पथकाचे विशेष म्हणजे ते आंतरराष्ट्रीय स्तरावरही पोहोचले आहे. शिवगर्जना पथकाने ॲडलेड, सिडनी आणि टोरांटो येथे आपली उपस्थिती नोंदवली आहे, आणि हे पहिले ढोल-ताशा पथक आहे जे आंतरराष्ट्रीय स्तरावर पोहोचले आहे. अशा प्रकारे, शिवगर्जना पथकाने केवळ पुण्यातच नाही तर जगभरात आपल्या संस्कृतीचा प्रचार आणि प्रसार केला आहे.
गणेशोत्सवात पथकाच्या या सामाजिक उपक्रमामुळे नागरिकांमध्ये एक सकारात्मक संदेश पसरला आहे. शिवगर्जना पथकाने त्यांचा व्यासपीठ वापरून महिलांच्या सुरक्षेची गरज अधोरेखित केली आहे. तुळशीबाग गणपती आगमन सोहळा २०२४ मध्ये दिलेल्या संदेशामुळे नागरिकांच्या मनात महिलांच्या सुरक्षेबद्दल जागरूकता निर्माण झाली आहे.
मिरवणुकीला सामाजिक रंग
तुळशीबाग गणपती आगमन सोहळा २०२४ मध्ये शिवगर्जना पथकाच्या सदस्यांनी महिलांच्या सुरक्षेसाठी जागरूकता निर्माण करण्यासाठी विविध फलक आणि बॅनर्स मिरवणुकीत उचलले होते. ढोल-ताशाच्या नादात या संदेशांनी मिरवणुकीला वेगळाच सामाजिक आणि संवेदनशील रंग दिला.
