!["जेवण सुरु होतं, अचानक स्फोटाचा आवाज आला, अन्..." डोंबिवली स्फोटातील प्रत्यक्षदर्शीनं काय सांगितलं?](http://media.assettype.com/freepressjournal-marathi%2F2024-05%2F53b2536e-d863-448a-883e-a000e8c39035%2F____________________________________2024_05_23T191625_091.jpg?w=480&auto=format%2Ccompress&fit=max)
मुंबई: डोंबिवली MIDC मधील अमुदान केमिकल्स कंपनीत आज दुपारी १ः३० वाजताच्या सुमारास स्फोट होऊन ६ जणांचा मृत्यू तर ४८ जण जखमी झाले आहेत. दरम्यान स्फोट झालेल्या अमुदान केमिकल्स कंपनीच्या परिसरातील असणाऱ्या एका हॉटेल मालकांनं नेमकं काय घडलं याची माहिती दिली आहे.
"जेवण सुरु होतं अन् अचानक आला स्फोटाचा आवाज...
अमुदान केमिकल्स या कंपनीच्या परिसरातील गणेश भुवन नावाचं एक हॉटेल आहे. या स्फोटानंतर या हॉटेलचंही नुकसान झालं आहे. हॉटेलचं छत तुटून आत आलं. यात हॉटेलमधील साहित्याचं मोठं नुकसान झालं आहे. मालक योगेश भट यांनी सांगितलं की, "२० ते २५ ग्राहक इथं जेवण करत होते आणि ८ कर्मचारी त्यांना सेवा देत होते. दरम्यान अचानक मोठा आवाज झाला. आम्हाला वाटलं की भूकंप झालाय, म्हणून आम्ही ग्राहकांना तातडीनं हॉटेलमधून बाहेर पडायला सांगितलं. या धावपळीत दोन ग्राहक किरकोळ जखमी झाले."
रेस्क्यू ऑपरेशन सुरु: मुख्यमंत्री
मुख्यमंत्री एकनाथ शिंदे यांनी सांगितलं की, "डोंबिवली स्फोटात चार जणांचा मृत्यू झाला आहे. तिथं आता रेस्क्यू ऑपरेशन आहे. स्वतः खासदार, जिल्हाधिकारी आणि त्यांची टीम तिथं आहे. रेस्क्यू ऑपरेशन सुरु आहे."
शेजारच्या कंपन्यांचंही नुकसान-
डोंबिवली एमआयडीसीतील आग दुर्घटनेमुळं अमुदान कंपनीच्या शेजारच्या कंपन्यांचं मोठं नुकसान झालं. अमुदान कंपनीत मोठ्या प्रमाणात केमिकल्सचा साठा ठेवला होता. त्याचं योग्य प्रकारे निरीक्षण होत नव्हतं, असा आरोप शेजारील कंपनीचे मालक डॉ.शेवडे यांनी केला.