पुणे : मानवसेवा, समर्पण आणि सामाजिक बांधिलकीचे प्रेरणादायी उदाहरण ठरलेल्या एका ऐतिहासिक उपक्रमात योग विद्या धाम, पिंपरी चिंचवड, महाराष्ट्र यांनी प्रमोद निफाडकर यांच्या दूरदर्शी नेतृत्वाखाली एका दिवसात सर्वाधिक वारकऱ्यांना पायांची मालिश सेवा या श्रेणीत नवीन विश्वविक्रम प्रस्थापित केला आहे.
हा उपक्रम पुणे-पंढरपूर वारी मार्गावरील दिवे घाटाच्या माथ्यावर असलेल्या झेंडेवाडी येथे आयोजित करण्यात आला. सुमारे १५३ योग प्रशिक्षक व मसाज थेरपिस्ट यांनी सकाळी ९.१५ ते सायंकाळी ५.१५ या कालावधीत ३२६४ वारकऱ्यांना निःस्वार्थ भावनेने पायांची मालिश सेवा प्रदान केली. वारीतील पुणे-सासवड हा सुमारे ३५ किलोमीटरचा टप्पा अत्यंत आव्हानात्मक मानला जातो. हा टप्पा पूर्ण करून दिवे घाट चढल्यानंतर वारकऱ्यांना शारीरिक आराम मिळावा, या उदात्त हेतूने हा सेवा उपक्रम राबवण्यात आला. हा उपक्रम मानवता, निःस्वार्थ सेवा, सामाजिक उत्तरदायित्व, संघभावना आणि महाराष्ट्राच्या समृद्ध वारकरी परंपरेप्रती असलेल्या आदराचे उत्कृष्ट उदाहरण आहे.
विश्वविक्रमाची खरी ओळख केवळ संख्येमध्ये नसून समाजावर होणाऱ्या सकारात्मक परिणामामध्ये असते. योग विद्या धाम यांनी सेवा, संस्कार आणि सामाजिक बांधिलकी यांचा प्रेरणादायी आदर्श निर्माण केला आहे. इतरांच्या सेवेतूनच खरे नेतृत्व आणि महानता सिद्ध होते.
सुषमा नार्वेकर, संस्थापक व मुख्य संपादक, वर्ल्ड रेकॉर्ड्स बुक ऑफ इंडिया
प्रमाणपत्र, पदकाने केला सन्मान
वर्ल्ड रेकॉर्ड्स बुक ऑफ इंडियाकडून योग विद्या धाम पिंपरी-चिंचवड येथील प्रमुख प्रमोद निफाडकर या उपक्रमाला अमूल्य सहकार्य करणारे निवृत्त सहाय्यक पोलीस आयुक्त सूर्यकांत निवृत्त सहाय दगडोबा केकाणे, सर्व स्वयंसेवक, सहकारी आणि या महान सेवा उपक्रमात सहभागी झालेल्या प्रत्येक वारकऱ्यांचे मनःपूर्वक अभिनंदन करून त्यांना प्रमाणपत्र व पदक देण्यात आले.
सर्व पुराव्यांची पडताळणी
या विश्वविक्रमासाठी आवश्यक असलेली लाभार्थी नोंद, स्वयंसेवकांची माहिती, छायाचित्रे, व्हिडीओ चित्रीकरण, स्वतंत्र साक्षीदारांचे अहवाल आणि इतर सर्व पुराव्यांची पडताळणी वर्ल्ड रेकॉर्ड्स बुक ऑफ इंडिया (डब्ल्यूआरबीआय) च्या अधिकृत निकषांनुसार करण्यात आली.
