![कल्याण ग्रामीण रस्त्यांसाठी ३२६ कोटी रुपयांची मंजूरी; रस्ते सिमेंट काँक्रीटचे होणार](http://media.assettype.com/freepressjournal-marathi%2F2022-08%2Fe1da0e3b-80e1-4fec-b941-3495e2c2a020%2FImc_1__2_.webp?w=480&auto=format%2Ccompress&fit=max)
उसरघर, घारीवली, निळजे, घेसर, कोळे, हेडूटने, मानगाव व भोपर या कल्याण ग्रामीणमधील रस्त्यांसाठी ३२६ कोटी रुपयांचा निधी एमएमआरडीएने मंजूर केला आहे. या निधीतून येथील रस्ते सिमेंट काँक्रीटचे करण्यात येणार आहेत.
कल्याण-डोंबिवलीचे खासदार डॉ. श्रीकांत शिंदे यांनी जिल्हा परिषद, एमएमआरडीए व सार्वजनिक बांधकाम विभागाकडे कल्याण ग्रामीण भागातील रस्ते सुधारण्यासाठी पाठपुरावा केला होता. शिंदे म्हणाले की, कल्याण-डोंबिवलीतील प्रवाशांचा प्रवास हा खड्डेमुक्त रस्त्यातून व्हावा, अशी माझी इच्छा होती. मी सतत याचा पाठपुरावा करत होतो. ग्रामीण भागातील रस्त्यांचे जाळे सुधारल्यास त्याचा फायदा गावाच्या विकासासाठी होतो. आम्ही एमएमआरडीएकडे निधीची मागणी केली होती. आमची मागणी मान्य झाली असून त्यांनी निधी मंजूर केला आहे. एमएमआरडीएने या कामासाठी निविदा जारी केल्या आहेत. शशिकांत दायमा म्हणाले की, रस्ते सिमेंट काँक्रीटचे बनल्यास कल्याण ग्रामीण भागातील प्रवास खड्डेमुक्त होईल. मात्र, हे काम प्रत्यक्षात यावे लागेल. एमएमआरडीएचे आयुक्त एस. व्ही. आर. श्रीनिवास म्हणाले की, कल्याण ग्रामीणच्या रस्त्यांसाठी ३२६ कोटींचा निधी मंजूर केला आहे. या प्रकल्पाविषयी अधिकची माहिती लवकरच दिली जाईल. एमएमआरडीएने उसरघर-निळजे-घोसर रस्त्यासाठी १०७.१४ कोटी, निळजे-कोळे-हेडूटळे, उसरघर-घारिवलीसाठी १२३.४९ कोटी तर हेडूटणे-मानगाव व भोपरसाठी ९५.९९ कोटी रुपये मंजूर केले. कल्याणचे निवासी ओमकार अय्यर यांनी सांगितले की, खासदार श्रीकांत शिंदे यांच्या पाठपुराव्यामुळे कल्याण-डोंबिवलीत ९८६ कोटी रुपयांचा निधी मिळाला आहे.
केडीएमसीने ३६० कोटी, डोंबिवली औद्योगिक वसाहतीतील रस्त्यांसाठी १०० कोटी तर अन्य रस्त्यांसाठी २०० कोटी खर्च केले जातील.