मुंबई : मध्य रेल्वे मार्गावरील मुलुंड ते नाहूर स्थानकादरम्यान सीएसएमटीकडे येणाऱ्या लोकलमधील दरवाजावर लटकलेल्या प्रवाशांना मंगळवारी दुखापत झाली. रेल्वे रुळाजवळील एका लोखंडी पेटीचा दरवाजा उडाल्याने आठ प्रवासी जखमी झाले. राजावाडी हॉस्पिटलमध्ये उपचार करून त्यांना घरी सोडले.
कर्जत - सीएसएमटी जलद लोकल मंगळवारी दुपारी १२.५० वाजण्याच्या सुमारास सीएसएमटीच्या दिशेने धावत होती. ही गाडी मुलुंड पास झाल्यानंतर नाहूर दरम्यान एका लोखंडी पेटीचा दरवाज्याचा पत्रा जनरल डब्यातून प्रवास करणाऱ्या आणि दरवाजात उभे असलेल्या प्रवाशांना लागला. या घटनेत आठ प्रवासी जखमी झाले. या घटनेची रेल्वेमार्फत चौकशी करण्यात येत आहे.
या घटनेनंतर रेल्वे कर्मचाऱ्यांनी घटनास्थळी धाव घेतली. यावेळी त्यांना रुळाजवळील ५ फूट उंच पेटीचा लोखंडी दरवाजा वायरने बांधून बंद केल्याचे दिसले. तसेच या दरवाजाची बिजागिरी गंजल्याने ढिली होऊन आतील इंटरलॉक उघडून तो दरवाजा हवेने उघडला.
