प्रतीक्षानगर येथील सोसायटीत आग; जीवितहानी नाही

मुंबई : सायन प्रतीक्षानगर सुंदर विहार येथील तळ अधिक सात मजली वृंदावन इमारतीच्या चौथ्या मजल्यावर सोमवारी दुपारी १२.३० वाजताच्या सुमारास आग लागली. या दुर्घटनेत कोणीही जखमी झालेले नाही. या दुर्घटनेमुळे प्रतीक्षानगर बस आगारातील बसेस अन्य मार्गावर वळवण्यात आल्या होत्या, असे बेस्ट उपक्रमाकडून सांगण्यात आले. प्रतीक्षानगर सुंदर विहार कुमकुम सोसायटीच्या मागे वृंदावन इमारतीच्या चौथ्या मजल्यावरील एका घरात सोमवारी दुपारी आग लागली. मुंबई अग्निशमन दलाला घटनेची माहिती मिळताच घटनास्थळी धाव घेत आगीवर नियंत्रण मिळवले. मात्र घरातील सामान जळून खाक झाले. आग नेमकी कशामुळे लागली याचे कारण समजू शकलेले नाही.