मंत्रिमंडळ विस्‍तारानंतर आता शिंदे-फडणवीस सरकारमधील खातेवाटप काय होणार याकडे सगळ्यांचे लक्ष लागले आहे. मुख्यमंत्री एकनाथ शिंदे हे स्‍वतःकडे आधीचेच नगरविकास हे खाते ठेवतील, तर उपमुख्यमंत्री देवेंद्र फडणवीस यांच्याकडे गृह आणि अर्थ ही दोन अतिशय महत्त्वाची खाती जातील, अशी शक्यता आहे.
भाजपचेच ज्‍येष्‍ठ मंत्री चंद्रकांत पाटील यांच्याकडे महसूल आणि सार्वजनिक बांधकाम तर सुधीर मुनगंटीवार यांच्याकडे ऊर्जा आणि वन ही खाती जाण्याची शक्यता आहे. विजयकुमार गावित यांच्याकडे आदिवासी विकास, गिरीश महाजन यांच्याकडे जलसंपदा खात्‍याचा कारभार जाण्याची शक्यता आहे. रवींद्र चव्हाण यांना गृहनिर्माण, अतुल सावे यांना आरोग्‍य, तर सुरेश खाडे यांच्याकडे सामाजिक न्याय खात्याची धुरा सोपविण्यात येऊ शकते. मंगलप्रभात लोढा यांना विधी व न्याय खात्याची जबाबदारी देण्यात येऊ शकते. शिंदे गटाच्या गुलाबराव पाटील यांच्याकडे पाणीपुरवठा, दादा भुसे यांच्याकडे कृषी, संजय राठोड ग्रामविकास, संदीपान भुमरे रोजगार हमी, उदय सामंत यांना उद्योग, तानाजी सावंत यांना शालेय शिक्षण तथा उच्च व तंत्रशिक्षण, अब्‍दुल सत्‍तार यांना अल्‍पसंख्याक विकास, दीपक केसरकर यांना पर्यटन आणि पर्यावरण, शंभुराज देसाई यांना उत्‍पादन शुल्‍क खात्याची जबाबदारी देण्यात येऊ शकते.
