बासमती तांदळाच्या दरात झाली वाढ; मागणीच्या तुलनेत आवक कमी असल्याने दर चढेच

बासमतीची लागवड उत्तरेकडील राज्यात मोठ्या प्रमाणावर केली जाते
 बासमती तांदळाच्या दरात झाली वाढ; मागणीच्या तुलनेत आवक कमी असल्याने दर चढेच

मागील आठवडाभरात एपीएमसी बाजारासह राज्यातील विविध बाजारपेठांत सर्वच बासमती तांदळाच्या दरात क्विंटलमागे २०० ते ३०० रुपयांनी वाढ झाली आहे. पारंपरिक बासमती सेला तांदूळ वगळल्यास बासमतीच्या सर्व प्रकारचे दर तेजीत आहेत. दरम्यान, मागणीच्या तुलनेत बासमती तांदळाची आवक कमी होत असल्याने दरात तेजी असल्याचे एपीएमसी धान्य मार्केटमधील व्यापारी हर्ष ठक्कर यांच्याकडून सांगण्यात आले. तर बासमतीचा जुना साठा बाजारात शिल्लक असल्याने नवीन हंगामातील आवक होईपर्यंत बासमतीचे दर चढेच राहणार असल्याचेदेखील व्यापाऱ्यांकडून सांगण्यात आले.

बासमतीची लागवड उत्तरेकडील राज्यात मोठ्या प्रमाणावर केली जाते. तेथील शेतकऱ्यांकडे सध्या तांदूळ उपलब्ध नाही. गिरणी आणि वितरकांकडे साठवणुकीतील बासमती तांदूळ आहे. अशातच परदेशातून बासमतीला मागणी वाढत असून बासमतीच्या १५०९ (धान) जातीला वर्षभरापूर्वी २६०० रुपये प्रतिक्विंटल भाव मिळाला होता. सध्या बासमती १५०९ जातीला प्रतिक्विंटल ४१०० रुपये भाव मिळत असल्याचे तांदळाचे व्यापारी ठक्कर यांनी सांगितले. दरम्यान, निर्यातदार व्यापाऱ्यांकडून बासमती तांदळाला मागणी वाढत आहे.

बासमतीच्या १५०९ जातीचा हंगाम संपत आला आहे. मागणी वाढती असून उत्तरेकडील राज्यांतील शेतकऱ्यांनी पारंपरिक बासमतीच्या तुलनेत १५०९ जातीच्या बासमती तांदळाच्या लागवडीस प्राधान्य दिले जात आहे. पारंपरिक बासमतीच्या तुलनेत १५०९ जातीच्या बासमतीच्या लागवडीस तुलनेने कमी कालावधी लागतो. परिणामी, बाजारात बासमतीच्या १५०९ च्या नवीन पिकाची आवक सुरू झाली असून परदेशात म्हणजेच इराण आणि सौदी अरेबियातून बासमती तांदळाला मागणी वाढली आहे.

Related Stories

No stories found.
marathi.freepressjournal.in