मुंबई : मुंबई महापालिकेच्या सार्वत्रिक निवडणुकीकरिता प्रभाग आरक्षण सोडत मंगळवारी सकाळी काढण्यात आली. यामध्ये महापालिकेच्या २२७ वॉर्डांपैकी ११४ प्रभाग हे महिला उमेदवारांसाठी आरक्षित झाले आहेत. त्यामुळे यंदा देशाची आर्थिक राजधानी असलेल्या मुंबई महापालिकेत महिलांचे वर्चस्व असणार आहे. या आरक्षण सोडतीत अनेक दिग्गजांना फटका बसला असून त्यामध्ये तेजस्विनी घोसाळकर, आशीष चेंबुरकर, यशवंत जाधव, नील सोमय्या, रवी राजा आदींचा समावेश आहे. दरम्यान, राज्यातील २९ मनपांतील आरक्षण सोडत मंगळवारी जाहीर करण्यात आली त्यामध्ये ठाणे महापालिकेत ६६ जागा, नवी मुंबईत ५६ जागा, नागपुरात ७६ जागा महिलांना आरक्षित झाल्या आहेत.
मुंबई महापालिकेच्या सोडतीत अनुसूचित जातींसाठी एकूण १५ राखीव वॉर्ड असून यामध्ये ८ वॉर्ड महिलांसाठी राखीव आहेत. तसेच अनुसूचित जमातीच्या २ जागा राखीव असून यापैकी १ जागा महिलांसाठी राखीव आहे. तर मागासवर्ग प्रवर्गासाठी ६१ जागा राखीव असून त्यापैकी ३१ जागा महिलांसाठी राखीव आहेत. तर १४९ सर्वसाधारण वॉर्डांपैकी महिलांसाठी ७४ वार्ड राखीव आहेत.
मुंबई महापालिकेच्या निवडणुकीसाठी आरक्षणाची सोडत वांद्रे पश्चिम येथील बालगंधर्व रंगमंदिरात काढण्यात आली. महापालिका आयुक्त तथा प्रशासक भूषण गगराणी यांच्या निर्देशानुसार निवडणूक विभागाने आरक्षण सोडतीच्या प्रक्रियेला सुरुवात केली. यावेळी २२७ प्रभागांच्या चिठ्ठ्या दाखवण्यात आल्या. त्यातून अनुसूचित जमाती आणि अनुसूचित जाती याकरिता सोडत काढण्यात आली. त्यानंतर मागासवर्गीय प्रवर्गाकरिता अर्थात ओबीसीकरिता आरक्षण सोडत काढण्यात आली.
याप्रसंगी महापालिका आयुक्त भूषण गगराणी, अतिरिक्त आयुक्त शहर अश्विनी जोशी, सहआयुक्त विश्वास शंकरवार, निवडणूक विभागाचे ओएसडी विजय बालमवार, उपायुक्त विश्वास मोटे, सहायक आयुक्त गजानन बेल्लाळे, पल्लेवाडआदी उपस्थित होते.
आरक्षणाच्या पहिल्या टप्प्यात अनुसूचित जाती आणि अनुसूचित जमाती प्रवर्गाकरिता उतरत्या क्रमाने लोकसंख्येनुसार सोडत काढण्यात आली. त्यानंतर उर्वरित प्रभाग क्रमांकाच्या चिठ्ठ्यामधून ६१ चिठ्ठ्या नागरिकांचा मागासवर्गीय प्रवर्गाकरिता काढण्यात आल्या. त्यातून ३१ महिला आरक्षित प्रभागांच्या चिठ्ठ्या काढण्यात आल्या. त्यानंतर उर्वरित चिठ्ठ्यांमधून पुरुष तथा खुल्या ओबीसी प्रवर्गाकरिता जागा राखीव करण्यात आल्या. तर उर्वरित १४९ जागांसाठी सर्वसामान्य प्रवर्गाकरिता आरक्षण काढण्यात आले. यात महिला खुल्या प्रवर्गाकरिता ७४ आणि पुरुष प्रवर्गाकरिता ७५ जागांकरिता सोडत काढण्यात आली.
अनुसूचित जातीचे राखीव प्रवर्ग : १५
महिला प्रभाग : ०८ (१३३, १८३, १४७, १८६, १५५, ११८, १५१, १८९)
पुरुष प्रभाग : ०७ (१४०, २१५, १४१, १४६, ९३, १५२, २६)
अनुसूचित जमाती राखीव प्रवर्ग : ०२
महिला प्रभाग : ०१ (१२१)
पुरुष प्रभाग : ०१ (५३)
सर्वसाधारण राखीव प्रवर्ग : १४९
महिला प्रभाग : ७४
१२६, १०३, १८४, ५१, १३२, १३१, ०२, ०८, ७९, १७४, १२४, १९९, १४२, ११४, १७, १०१, ४४, २२४, ८४, ६६, २०१, २०५, ३८, ९६, ७१, ११२, १७९, ११६, १६३, ८३, १५६, १७२, ८१, ७८, २८, ८८, १५, ३१, २४, १३४, १८०, २०९, ९४, ११५, १७५, १९७, १५७, २०३, १६, ९७, २१२, २२०, ७४, २१, ७७, ६१, ६४, ७३, ११०, ६०, १७७, १७३, ३७, १४, १३९, २१८, २२७, ३९, ४२, १२७, १९६, १४३, ५६, २१३
पुरुष प्रभाग ७५
३, ५, ७, ९, २०, २२, २३, २५, २९, ३०, ३४, ३५, ३६, ४०, ४३, ४७, ४८, ५४, ५५, ५७, ५८, ५९, ६२, ६५, ६७, ६८, ७५, ८६, ८९, ९०, ९२, ९८, १०४, १०६, १०७, १०९, ११९, १२०, १२२, १२३, १२५, १४४, १४५, १४८, १४९, १५४, १५९, १६०, १६१, १६२, १६४, १६५, १६६, १६८, १६९, १७८, १८१, १८५, १८८, १९०, १९२, १९४, २००, २०२, २०४, २०६, २०७, २१०,२११, २१४, २१७, २२१, २२१
मागासवर्गीय प्रवर्ग महिला प्रभाग : ३१
५२, ४६, १५८, १५०, ३३, ०६, १२, १६७, ११७, १०८, १२८, ८०, १००, १९, ८२, ४९, ११, १७६, २१६, १९१, १७०, १३, १०५, १९८, ७२, १५३, १२९, १८, ०१, ३२, २७
पुरुष प्रभाग : ३०
४१, ६३, १९३, १९५, १८७, ९१, १३७, १३०, २२३, १७१, ८७, २२२, १३६, १११, १०, १३८, ७६, २१९, ०४, २२६, २०८, ११३, ४५, १८२, ५०, ९५, ६९, ७०, ८५, १३५
मुंबईतल्या ४ जागा सलग ओबीसी आरक्षित
मंगळवारी काढण्यात आलेल्या ओबीसी आरक्षणामध्ये वॉर्ड क्रमांक १०, ११, १२, १३ हे वॉर्ड सलग ओबीसीसाठी आरक्षित झाले आहेत. या चारही मतदारसंघात भाजपचे ओबीसी नगरसेवक निवडून आले होते.
ठाकरे गटाचे विनोद घोसाळकर यांची सून तेजस्विनी घोसाळकर यांचा वॉर्ड क्रमांक १ मतदारसंघ मागासवर्ग प्रवर्ग म्हणून आरक्षित झाला आहे. गेल्या काही दिवसांपासून तेजस्विनी घोसाळकरानी निवडणुकीची तयारी सुरू केली होती. तर मिलिंद वैद्य यांचा १८२ वॉर्डदेखील आता मागासवर्ग प्रवर्ग म्हणून आरक्षित झाला आहे. मागील निवडणुकीत वैद्य यांचा मतदारसंघ खुल्या प्रवर्गातून आरक्षित झाला होता. तर माजी नगरसेवक कप्तान मलिक आणि मुंबई महानगरपालिकेचे माजी नगरसेवक रविराजा यांचे सर्वसाधारण प्रवर्गात असलेले वॉर्ड यंदा ओबीसी प्रवर्गात राखीव झाल्याने त्यांना मोठा धक्का बसला आहे. तसेच माजी खासदार किरीट सोमय्या यांचे पुत्र आणि माजी नगरसेवक नील सोमय्या यांचाही वॉर्ड क्रमांक १०८ यंदा मागासवर्ग (ओबीसी) महिला प्रवर्गासाठी राखीव झाला आहे. त्यामुळे सोमय्या यांना मोठा धक्का बसला आहे.
माजी महापौर किशोरी पेडणेकर यांचा जीव मात्र भांड्यात पडला आहे. कारण पेडणेकर या २०१७ साली ज्या वॉर्ड क्रमांक १९९ मधून निवडून आल्या होत्या तो वॉर्ड यंदाही सर्वसाधारण महिला प्रवर्गासाठी राखीव घोषित झाला आहे. तर गीता गवळी, राखी जाधव यांचाही मार्ग मोकळा झाला असून हे दोन्ही वॉर्ड महिला प्रवर्गासाठी राखीव झाले आहेत.
पुण्यात दिग्गजांचे गणित बिघडले
पुणे महानगरपालिका निवडणुकीसाठी ४१ प्रभागातील १६५ जागांसाठी आरक्षण सोडत मंगळवारी पार पडली. या सोडतीने शहरातील अनेक दिग्गज नेत्यांचे गणितच बदलले आहे. आरक्षण बदलामुळे अनेक अनुभवी नगरसेवक आणि माजी पदाधिकारी अडचणीत आले आहेत, तर काहींना पुन्हा निवडणूक लढवण्यासाठी खुल्या (सर्वसाधारण) गटात उतरण्याची वेळ आली आहे.
पिंपरी चिंचवड महापालिका निवडणुकांसाठी ३२ प्रभागातील १२८ जागांसाठी आरक्षण सोडत मंगळवारी पार पडली. यात विधानसभा उपाध्यक्ष अण्णा बनसोडे यांचा मुलगा सिद्धार्थ बनसोडे ज्या दोन प्रभागातून तयारी करत होता. तिथे महिलांसाठी आरक्षण जाहीर झाले आहे. यामुळे आता अन्य प्रभागाचा विचार आमदार बनसोडेना करावा लागणार आहे. यासोबतच भाजपच्या सत्तेतील पहिल्या स्थायी समिती सभापती सीमा सावळे, शरद पवार गटाचे शहराध्यक्ष तुषार कामठे, पिंपरी विधानसभेची निवडणूक शरद पवारांच्या तिकिटावर लढलेल्या सुलक्षणा शिलवंत यांनाही धक्का बसला आहे.
छत्रपती संभाजीनगर ५७ जागा महिलांसाठी
आगामी महानगरपालिका निवडणुकीसाठी छत्रपती संभाजीनगरमधील आरक्षण सोडतीत एकूण ११५ प्रभागांसाठीचा आरक्षण तक्ता निश्चित क्ररण्यात आला असून, ५७ जागा महिलांसाठी राखीव ठेवण्यात आल्या आहेत.
यांना बसला फटका
माजी नगरसेविका तेजस्विनी घोसाळकर, आशीष चेंबुरकर, सुरेश पाटील, दत्ता नरवणकर, यशवंत जाधव, नील सोमय्या, स्नेहल आंबेकर, विशाखा राऊत, सुजाता पाटेकर, सदानंद परब, रवी राजा, स्वप्नील टेंबवलकर, उपेंद्र सावंत, मंगेश सातमकर, अनिल पाटणकर, सुफियान वणू, मकरंद नार्वेकर.
यांना मिळाला दिलासा
किशोरी पेडणेकर, उज्ज्वला मोडक, शीतल म्हात्रे, सचिन पडवळ, संजय घाडी, सुहास वाडकर, राजूल पटेल, मेहर हैदर मोहसिन, अलका केरकर, प्रभाकर शिंदे, प्रकाश गंगाधरे, राखी जाधव, गीता गवळी, हेमांगी वरळीकर, आकाश फुरोहित, सहिदा खान, अमेय घोले.
