मुंबई : मुंबईतील पारंपरिक (कन्व्हेन्शनल नॉन-एटीसी) रस्ते वाहतूक सिग्नल यंत्रणा आणि फ्लॅशिंग बीकन (चमकणारे दिवे) सुरळीत ठेवण्यासाठी बृहन्मुंबई महानगरपालिका पुढील दोन वर्षांत तब्बल १९ कोटी १५ लाख ५५ हजार ५०९ रुपये खर्च करणार आहे. यासाठी १ सप्टेंबर २०२६ ते ३१ ऑगस्ट २०२८ या कालावधीसाठी काम देण्यात येणार आहे.
पालिकेच्या प्रस्तावानुसार, बेट शहरातील कन्व्हेन्शनल नॉन-एटीसी रोड ट्रॅफिक सिग्नल सिस्टिम व फ्लॅशिंग बीकनच्या देखभालीसाठी ६ कोटी ३९ लाख ४० हजार २८२ रुपये खर्च करण्यात येणार आहे. तर पश्चिम उपनगरासाठी हा खर्च ६ कोटी ७३ लाख ५ हजार ३९९ रुपये, तर पूर्व उपनगरासाठी ६ कोटी ३ लाख ९ हजार ८२८ रुपये इतका असेल. तिन्ही विभागांतील एकूण खर्च १९.१५ कोटी रुपये इतका आहे.
या देखभाल कामांमध्ये सिग्नल नियंत्रक यंत्रणा, सिग्नल दिवे, विद्युत उपकरणे, केबलिंग, फ्लॅशिंग बीकन यांचा समावेश असेल.
