मुंबई : जन्मदात्या वडिलांची शेवटच्या श्वासापर्यंत काळजी घेणाऱ्या मुलीला उच्च न्यायालयाने मोठा दिलासा दिला. वडिलांनी मुलीला संपूर्ण मालमत्ता देत बनवलेले मृत्युपत्र न्या. सारंग कोतवाल आणि न्या. रणजितसिंह भोसले यांच्या खंडपीठाने वैध ठरवले. या मृत्युपत्राद्वारे वडिलांनी मुलाला मालमत्तेतून पूर्णपणे बेदखल केले होते. त्याआधारे न्यायालयाने मुलाचे दावे फेटाळले.
मुंबईच्या नेपिअन सी रोड येथील रहिवासी तारापदा चॅटर्जी यांचे २४ ऑगस्ट १९९० रोजी निधन झाले. त्यांनी २१ मार्च १९८९ रोजी आपले शेवटचे मृत्युपत्र तयार केले होते. या मृत्युपत्रात त्यांनी आपली मुलगी शांता चॅटर्जी हिच्या नावावर संपूर्ण मालमत्ता केली व मुलाचे नावही घेतले नव्हते.
मुलाने व त्याच्या कायदेशीर वारसांनी मृत्युपत्राला आव्हान दिले होते. वडिलांच्या स्वाक्षरीमध्ये फेरफार करण्यात आल्याचा आणि ते मानसिकदृष्ट्या सक्षम नसल्याचा आरोप मुलाच्या वतीने करण्यात आला होता.
