बॉम्बे आयआयटीतील मुलींच्या हॉस्टेलमध्ये डोकावून पाहणाऱ्या एका आरोपीस पवई पोलिसांनी अटक केली. पिंटू गारिया असे या आरोपीचे नाव असून तो आयआयटीच्या कॅण्टीनचा कर्मचारी असल्याचे पोलिसांनी सांगितले. अटकेनंतर त्याला अंधेरीतील लोकल कोर्टात हजर करण्यात आले. पवईतील बॉम्बे आयआयटीमध्ये देशभरातून शिक्षणासाठी विद्यार्थी येत असून या विद्यार्थ्यांची राहण्याची व्यवस्था तेथीलच वसतिगृहात केली जाते. रविवारी सायंकाळी काही मुली हॉस्टेलमध्ये बसल्या होत्या. यावेळी तिथे कोणीतरी त्यांना डोकावून पाहत असल्याचे काही मुलींच्या लक्षात आले. त्यामुळे त्यांनी सुरक्षारक्षकांना ही माहिती सांगितली. यानंतर सुरक्षाक्षकाने पवई पोलिसांना ही माहिती दिली. घटनास्थळाचे सीसीटीव्ही फुटेज ताब्यात घेतल्यांनतर तिथे पिंटू हा मुलींना डोकावून पाहत असल्याचे दिसून आले. त्यानंतर त्याला पोलिसांनी चौकशीसाठी ताब्यात घेतले होते. त्याच्याविरुद्ध गुन्हा दाखल करून त्याला नंतर पोलिसांनी अटक केली.
