मुंबई : शहरातील बांधकाम व्यावसायिक ललित टेकचंदानी यांच्या अनेक ठिकाणी मुंबई पोलिसांच्या आर्थिक गुन्हे शाखेने छापे टाकले.
त्यांच्या विरोधात फसवणुकीचा गुन्हा दाखल आहे, असे एका अधिकाऱ्याने सांगितले. टेकचंदानी यांचे निवासस्थान, त्यांचे कार्यालय आणि शहरातील इतर दोन परिसरांची झडती सुरू असल्याचे त्यांनी सांगितले. मुंबई पोलिसांनी गेल्या आठवड्यात टेकचंदानी, त्यांची पत्नी, त्यांची कंपनी सुप्रीम कन्स्ट्रक्शन्सचे संचालक आणि इतर काही जणांविरुद्ध चेंबूर पोलीस ठाण्यात प्रथम माहिती अहवाल (एफआयआर) नोंदवला होता.
या प्रकरणातील फिर्यादीने सांगितले की, त्यांनी नवी मुंबईतील तळोजा येथील टेकचंदानीच्या बांधकाम प्रकल्पात ३६ लाख रुपयांची गुंतवणूक केली होती. २०१७ मध्ये प्रकल्प तयार होईल, असे कंपनीने त्याला आश्वासन दिले. तथापि, २०१६ मध्ये त्याचे बांधकाम अचानक थांबले. शेकडो फ्लॅट खरेदीदारांनी टेकचंदानीच्या प्रकल्पात गुंतवणूक केली, परंतु त्यांना ना फ्लॅट मिळाले, ना त्यांचे पैसे परत मिळाले, असे तक्रारीत म्हटले आहे. तक्रारीच्या आधारे, टेकचंदानी आणि इतरांवर भारतीय दंड संहितेच्या कलम ४२० (फसवणूक), ४०६ (गुन्हेगारी विश्वासभंग) आणि इतर कलमांच्या अंतर्गत गुन्हा दाखल करण्यात आला, असे पोलिसांनी सांगितले. एफआयआर नोंदवल्यानंतर टेकचंदानी आणि इतरांविरुद्ध खटल्याचा तपास चालू असल्याचेही अधिकाऱ्याने स्पष्ट केले.
गेल्या आठवड्यात टेकचंदानी आणि इतरांविरुद्ध नवी मुंबईतील तळोजा पोलीस ठाण्यात आणखी एक एफआयआर दाखल करण्यात आला होता. तक्रारीनुसार, १६० घर खरेदीदारांना आरोपींनी त्याच्या कंपनीच्या नवी मुंबईतील खारघर येथील गृहनिर्माण प्रकल्पात ४४ कोटी रुपयांची फसवणूक केल्याचे पोलिसांनी सांगितले.
