मुंबई : एक खोक्याभाई काय घेऊन बसलात, सगळी विधानसभाच खोक्याभाईंनी भरली आहे, अशा शब्दांत मनसे अध्यक्ष राज ठाकरे यांनी महाराष्ट्रातील सध्याच्या राजकीय स्थितीवर भाष्य केले आहे. विधानसभेत सगळे खोकेभाईच भरले आहेत, असा टोला त्यांनी मुंबईत पार पडलेल्या मनसेच्या पदाधिकारी बैठकीत लगावला.
राज ठाकरे म्हणाले की, बैठकीत नियुक्त करण्यात आलेल्या नवीन समितीमुळे, तिच्या रचनेमुळे मतांमध्ये परिवर्तन होणार का, राजकारणाचा अभ्यास कमी असल्यामुळे तुम्हाला असे प्रश्न पडतात. गुढीपाडव्याच्या दिवशी मला जे बोलायचे ते मी बोलेन, असेही ते म्हणाले.
संदीप देशपांडे यांनी नव्या जबाबदारीवर भाष्य करताना सांगितले की, मोठी जबाबदारी, मोठा विश्वास राज यांनी दाखवला आहे. मनसे मिशन मुंबई महानगरपालिका सुरू झाले आहे. मनसे पालिका जोमात लढेल. जास्तीत जास्त नगरसेवक निवडून आणण्यासाठी आमचे आता प्रयत्न असतील,असे देशपांडे म्हणाले.
