मुंबई : शासकीय खरेदी केंद्रावर धान/ भरड धान्य विक्रीसाठी शासनाच्या ऑनलाइन पोर्टलवर नोंदणी करणे अनिवार्य आहे. ऑनलाईन नोंदणीसाठी ३१ डिसेंबरची मुदत होती. मात्र शेतकरी या लाभापासून वंचित राहू नये यासाठी धान-भरड धान्य खरेदी नोंदणीसाठी १५ जानेवारी ही अखेरची मुदतवाढ देण्यात आल्याचे अन्न, नागरी पुरवठा व ग्राहक संरक्षण मंत्री धनंजय मुंडे यांनी सांगितले.
खरीप पणन हंगाम २०२४-२५ मध्ये शेतकरी नोंदणी करता ३१ डिसेंबर २०१४ पर्यंत अंतिम मुदत होती. मात्र अनेक भागातील शेतकरी नोंदणीपासून वंचित असल्याने शासनाने नोंदणीसाठी मुदतवाढ द्यावी, अशी मागणी अर्थ व नियोजन विभागाचे राज्यमंत्री ॲड. आशिष जयस्वाल, माजी मंत्री व ज्येष्ठ सदस्य सुधीर मुनगंटीवार, आ. राजू मोरे यांच्यासह विविध लोकप्रतिनिधींनी केली होती. त्यानुसार शेतकरी नोंदणीची मुदत १४ जानेवारीपर्यंत वाढवण्यात आली आहे.
दरम्यान, ही मुदतवाढ अंतिम असून विहित मुदतीत शेतकऱ्यांनी नोंदणी प्रक्रिया पूर्ण करावी, असे आवाहन धनंजय मुंडे यांनी केले आहे.
