![फरार बुकी सौरभ चंद्राकारची नाईट क्लबमध्ये गुंतवणूक](http://media.assettype.com/freepressjournal-marathi%2F2023-11%2F15cc3d35-2ce2-459c-9f7f-86f5c0759659%2Fff22.avif?w=480&auto=format%2Ccompress&fit=max)
मुंबई : महादेव ॲॅपच्या माध्यमातून क्रिकेट बेटिंग घेणारा फरार बुकी सौरभ चंद्राकार याने दुबई व लंडनच्या नाईट क्लबमध्ये मोठी गुंतवणूक केल्याचे उघड झाले आहे. मॅचफिक्सींगमधून मिळणारा नफा तो मुंबईतील इव्हेंट मॅनेजमेंट कंपनी टीम इनोव्हेशन एलएलपीत गुंतवत असल्याचे उघड झाले आहे.
टीम इनोव्हेशन व त्याचा प्रवर्तक सिद्धेश कुडतरकर व त्याची प्रेयसी स्नेहल शिर्के यांचे नाव मुंबई पोलिसांच्या एफआयआरमध्ये नोंदवले आहे. भारत-न्यूझीलंड क्रिकेट सामन्यांची तिकिटे काळ्या बाजारात विकण्यासाठी तिकिटे उपलब्ध करून दिल्याबद्दल मुंबई पोलिसांच्या एफआयआरमध्ये त्यांचे नाव टाकण्यात आले आहे. तिकीटाच्या काळाबाजारप्रकरणी यापूर्वी आकाश कोठारी व रोशन गुरुबक्षानी यांना पोलिसांनी अटक केली आहे.
पोलिसांनी टीम इनोव्हेट एलएलपीच्या कार्यालय क्रिस्टल प्लाझा, शास्त्री नगर, अंधेरी येथे शुक्रवारी रात्री छापेमारी केली. तेथून डिजीटल उपकरणे जप्त केली. पोलिसांनी सिद्धेश कुडतरकर व स्नेहल शिर्केला चौकशीसाठी बोलवले आहे. सिद्धेश सध्या इटलीत आहे.
महादेव ॲॅप घोटाळ्याचा तपास सध्या ‘ईडी’कडून सुरू आहे. या ॲॅपमार्फत क्रिकेट सामने, फुटबॉल, टेनिस व पोकर व तीन पत्ती यांच्यावर जुगार खेळला जात होता. सौरभ चंद्राकार हा दुबईत राहून हा व्यवसाय करत आहे. छत्तीसगडमध्ये चंद्राकार व त्याचा मित्र रवी उप्पल हे रस विकत होते.
सौरभ चंद्राकार याने मॅचफिक्सींग व क्रिकेट बेटिंगमधून मिळणारा नफा लंडनच्या प्राऊड लेट नाईट क्लब व व्हिक्टोरिया एम्बार्कमेंट व दुबईतील मँटीस डान्सेस व नाईट क्लबमध्ये गुंतवला. मुंबई पोलिसांनी सौरभ चंद्राकार याच्या महादेव ॲॅपविरोधात गुन्हा नोंदवला आहे. त्यात ३२ बुकींचाही समावेश आहे.
भारत-न्यूझीलंड उपांत्य फेरीच्या सामन्याची तिकीट विक्री ऑनलाईन प्लॅटफार्मवरून करण्यात आली. त्यातील काही तिकीटे काळ्याबाजारात फिरवण्यात आली. २५०० रुपयांचे तिकीट १ लाख रुपयांना विकण्यात आले. सौरभ चंद्राकार याने क्रिकेट बेटिंग व मॅच फिक्सींगवर नफा कमवायला सुरुवात केली. हा नफा त्याने मोहित बिजलानी व सिद्धेश कुडतरकर यांच्याकडून चालवल्या जाणाऱ्या टीम इनोव्हेशन एलएलपीमध्ये गुंतवला. ही कंपनी लंडन व दुबईत नाईटक्लब व बार चालवते.
सिद्धेश कुडतरकर सध्या इटलीच्या मिलानमध्ये आहे. तो तो तिथे बॅचरल पार्टी करत आहे. कुडतरकर व त्याची प्रेयसी स्नेहल शिर्के यांना जे. जे. मार्ग पोलिसांनी समन्स बजावले आहे. दोघांशीही संपर्क साधला असता, त्यांनी प्रतिसाद दिला नाही.