मुंबई : यंदा गणेशोत्सवात एकूण चार दिवस रात्री १२ वाजेपर्यंत ध्वनिक्षेपक व ध्वनीवर्धक लावण्याची परवानगी जिल्हाधिकाऱ्यांनी दिली आहे. या चार दिवसांमध्ये अर्थात दीड दिवस, पाच दिवस, सात दिवस आणि अनंत चतुर्दशी या दिवसांचा समावेश आहे. तर या दिवसांमध्ये अधिक एक दिवस वाढवून द्यावा, अशी मागणी बृहन्मुंबई सार्वजनिक गणेशोत्सव समन्वयक समितीने राज्य सरकारकडे केली आहे.
उच्च न्यायालयाच्या आदेशानुसार ध्वनिप्रदूषण नियम २००० अंतर्गत केंद्र शासनाने प्रत्येक राज्याला १५ दिवसांसाठी रात्री १२ वाजेपर्यंत ध्वनिक्षेपक व ध्वनिवर्धक लावण्याची परवानगी दिली आहे. परवानगीमध्ये ध्वनीची मर्यादा दिवसा ५५ डेसीबल व रात्री ४५ डेसीबलपर्यंत मर्यादित आहे. सन २०१३ पर्यंत समितीच्या मागणीनुसार गणेशोत्सव काळात ४ दिवस रात्री १२ पर्यंत परवानगी मिळत होती. ही परवानगी गणेश विसर्जनाच्या दिवसांपर्यंत म्हणजेच दीड दिवस, पाच दिवस, सात दिवस आणि अनंत चतुर्दशी या चार दिवसासाठी मर्यादित आहे. उर्वरित १५ दिवसांपैकी ९ दिवस वेगवेगळ्या धार्मिक सणासाठी ध्वनिक्षेपक वापरण्यासाठीची परवानगी जिल्हाधिकाऱ्यांकडून देण्यात येते.
दरम्यान, यंदा गणेशोत्सवात ध्वनिक्षेपकासाठी आणखी एक दिवस वाढवून द्यावा अशी मागणी बृहन्मुंबई सार्वजनिक गणेशोत्सव समन्वयक समितीने केली आहे.
