मुंबई : मुंबई रेल्वे विकास कॉर्पोरेशनने शुक्रवारी नवीन एलिव्हेटेड डेक आणि १२ मीटर रुंद असलेल्या दक्षिण बाजूच्या फूट ओव्हर ब्रिजचा पहिला टप्पा प्रवाशांच्या सेवेत दाखल केला आहे. त्यामुळे आता घाटकोपर रेल्वे स्टेशन वापरणाऱ्या प्रवाशांचा प्रवास अधिक सुकर होण्यास मदत होणार आहे.
मुंबईतील अत्यंत गजबजलेल्या घाटकोपर स्टेशनवरील गर्दी कमी करणे आणि मध्य रेल्वे व मेट्रो स्थानकांमधील कनेक्टिव्हिटी अधिक सुधारणे हा या प्रकल्पाचा मुख्य उद्देश आहे. नव्याने सुरू झालेल्या या सुविधांमुळे प्रवाशांच्या वाहतुकीसाठी अतिरिक्त जागा उपलब्ध होणार असून, विशेषतः गर्दीच्या वेळेत प्रवाशांची ये-जा अधिक जलद आणि सुरक्षित होणार आहे.
५५ मीटर लांबीचा हा नवीन एलिव्हेटेड डेक सध्याच्या मेट्रो एफओबीला नवीन दक्षिण बाजूच्या एफओबीशी जोडतो. तसेच, ६.१ मीटर रुंद जिन्याद्वारे मेट्रो स्टेशनला थेट जोडले जात असल्याने प्रवाशांना मेट्रो आणि उपनगरीय रेल्वे सेवेदरम्यान प्रवास बदलणे अधिक सोयीचे होणार आहे.
हा प्रकल्प मुंबईच्या उपनगरीय रेल्वे पायाभूत सुविधांच्या आधुनिकीकरणातील आणखी एक महत्त्वाचे पाऊल आहे. ‘घाटकोपर येथील नवीन एलिव्हेटेड डेक आणि दक्षिण बाजूचा फूट ओव्हर ब्रिज सुरू होणे हा मुंबईच्या उपनगरीय रेल्वे पायाभूत सुविधांचे आधुनिकीकरण करण्याच्या एमआरव्हीसीच्या वचनबद्धतेतील एक महत्त्वाचा टप्पा आहे. या एकात्मिक प्रवासी सुविधांमुळे स्थानकावरील वाहतूक प्रवाहात कमालीची सुधारणा होईल.
- विलास वाडेकर, एमआरव्हीसी, अध्यक्ष आणि एमडी
