मुंबई : आरोग्य क्षेत्रात रुग्णांचे निदान करायला वापरण्यात येणाऱ्या ‘एमआरआय’ स्कॅनिंगमध्ये वापरण्यात येणाऱ्या हेलियमची टंचाई निर्माण झाली आहे. ही बाब आरोग्य क्षेत्रासाठी चिंताजनक ठरली आहे.
मानवी शरीराच्या स्पष्ट प्रतिमा मिळवण्यासाठी एमआरआय मशिनमध्ये शक्तिशाली ‘सुपरकंडक्टिंग मॅग्नेट्स’चा वापर केला जातो. हे चुंबकीय क्षेत्र प्रभावीपणे कार्य करण्यासाठी ते उणे तापमानात ठेवावे लागतात आणि त्यासाठी द्रव हेलियम अनिवार्य आहे.
‘महाराष्ट्र राज्य रेडिओलॉजी असोसिएशन’चे माजी अध्यक्ष डॉ. प्रशांत पाटील यांनी स्पष्ट केले की, एमआरआय मशिनमध्ये वारंवार हेलियम भरण्याची गरज नसते. नानावटी मॅक्स सुपर स्पेशालिटी हॉस्पिटलचे वैद्यकीय सेवा संचालक आणि रेडिओलॉजी विभाग प्रमुख डॉ. दीपक पत्कर यांनी सांगितले की, जुन्या एमआरआय मॉडेल्सना तीन वर्षांनी रिफिलिंगची गरज असते, तर नवीन मशिन पाच वर्षांपर्यंत चालू शकतात. तंत्रज्ञानातील प्रगतीमुळे हेलियमच्या पुरवठ्यावरील अवलंबित्व कमी झाले आहे.
