मुंबई : कुर्ला येथे झालेल्या बेस्ट बस अपघातातील गंभीर जखमी अवस्थेतल्या एका महिलेच्या अंगावरील दागिने मदत करण्याच्या बहाण्याने एक अज्ञान इसम चोरून नेत असल्याचा व्हिडीओ व्हायरल झाला होता. आता या प्रकरणी अज्ञात व्यक्ती विरुद्ध गुन्हा दाखल करण्यात आला असल्याचे पोलिसांनी सांगितले.
फातिमा कनिझ अन्सारी (५५) ही महिला या दुर्दैवी अपघातात बस खाली चिरडली गेली. घटनास्थळी ती जखमी अवस्थेत पडलेली असताना तिच्या हातातील सोन्याच्या बांगड्या एक व्यक्ती काढून घेत असल्याचे व्हिडीओत दिसत आहे. हा इसम दागिने काढत असताना, आपण हे दागिने सुरक्षित ठेवणार आहोत आणि या महिलेच्या कुटुंबीयांना याबद्दल सांगणार असल्याचे आजूबाजूच्यांना सांगत होता. मात्र. अन्सारी यांच्या कुटुंबीयांनी कुणीतरी बांगड्या चोरून नेल्याची तक्रारी पोलिसांत केली असल्याचे पोलिसांनी सांगितले.
फातिमा अन्सारी या एस जी बर्वे मार्ग येथे इमारतीबाहेर वाट पहात उभ्या असताना बसने त्यांना चिरडले. त्यांच्या कुटुंबीयांच्या तक्रारीवरून पोलिसांनी अज्ञात व्यक्तीविरुतद्ध भारतीय न्याय संहितेंतर्गत गुन्हा दाखल केला.
