मुंबई : बेस्ट उपक्रमाची आर्थिक कोंडी फोडण्यासाठी बस डेपो भाडेतत्त्वावर देण्याआधी धोरण ठरवा, उत्पन्नाचे स्त्रोत शोधा, बेस्ट उपक्रमाच्या मुंबईभरात जागा असून त्या ठिकाणाहून उत्पन्न वाढीसाठी प्रयत्न करा, असे निर्देश मुख्यमंत्री देवेंद्र फडणवीस यांनी बेस्ट उपक्रमाला दिले.
मुंबईतील नागरिकांना प्रवास करताना जास्त ताटकळत थांबावे लागू नये यासाठी नियोजन करावे. बसची संख्या वाढवण्यासोबत बस किती वेळात येणार, सध्या कुठे आहे, याची माहिती प्रवाशांना होण्यासाठी यंत्रणेची त्वरित अंमलबजावणी करावी. बांद्रा, दिंडोशी आणि देवनार बस डेपोंचा पुनर्विकास करताना जागा भाडेतत्त्वावर देताना धोरण ठरवावे. त्याठिकाणी व्यावसायिक गाळे, रहिवास आणि बेस्ट बस आगार अशा पद्धतीने रचना केल्यास बेस्टचे उत्पन्न वाढण्यास मदत होणार आहे. मुंबईतील छोटे, अरूंद रस्ते पाहता अत्याधुनिक छोट्या बस घ्याव्यात. यासाठी केंद्र सरकारकडून येणाऱ्या एन कॅपच्या (नॅशनल क्लीन एअर पॉलिसी) निधीचा वापर करावा, असे निर्देश फडणवीस यांनी यावेळी दिले.
सह्याद्री अतिथीगृहात बृहन्मुंबई विद्युत पुरवठा आणि परिवहन उपक्रमाच्या (बेस्ट) आढावा बैठकीत मुख्यमंत्री फडणवीस बोलत होते. यावेळी उपमुख्यमंत्री एकनाथ शिंदे, मुंबई उपनगर जिल्ह्याचे पालकमंत्री मंगल प्रभात लोढा, सांस्कृतिक कार्य, माहिती तंत्रज्ञान मंत्री ॲड. आशिष शेलार, वित्त विभागाचे अपर मुख्य सचिव ओ. पी. गुप्ता, मुंबई महापालिका आयुक्त तथा प्रशासक भूषण गगराणी, नियोजन विभागाचे अपर मुख्य सचिव राजगोपाल देवरा, परिवहन विभागाचे अपर मुख्य सचिव संजय सेठी, ऊर्जा विभागाच्या अपर मुख्य सचिव आभा शुक्ला, बेस्टचे महाव्यवस्थापक एस. व्ही. आर श्रीनिवास आदींसह वरिष्ठ अधिकारी उपस्थित होते.
कर्मचाऱ्यांची देणी देण्यासाठी १,६५८ कोटी रुपयांची मदत करा
बेस्ट उपक्रमाची आर्थिक स्थिती खालावली असून कर्मचाऱ्यांची देणी देण्यासाठी १,६५८ कोटी रुपयांची मदत देण्यात यावी, सरकारी कर माफ करण्यात यावा, टोल माफ करावा, अशी मागणी यावेळी बेस्ट उपक्रमाचे महाव्यवस्थापक एस. व्ही. आर. श्रीनिवास यांनी केली.
सिंगल मोबिलिटीचा बेस्टला फायदा
मुंबईत लोकल रेल्वे, मेट्रो, मोनोरेल आणि बससाठी सार्वजनिक वाहतूक प्रणाली एका सिंगल मोबिलिटी प्लॅटफॉर्मवर आणण्याची प्रणाली तयार होत आहे. यातून नागरिकांना एकाच तिकिटात प्रवास करता येणार असून बेस्टला याचाही फायदा होणार असल्याचे मुख्यमंत्र्यांनी सांगितले.
बस डेपोत मराठी सिनेमा थिएटर
बस डेपोंचा पुनर्विकास करताना करमणूक केंद्राचाही विचार करण्याबाबत मंत्री शेलार यांनी सूचना केल्या. मराठी सिनेमाला उर्जितावस्था येण्यासाठी पाच ठिकाणी मराठी सिनेमा थिएटरची निर्मिती केल्यास यातूनही उत्पन्न वाढीस मदत होईल, असेही मुख्यमंत्र्यांनी सांगितले.
मनपा बजेटमध्ये ३ टक्के निधीची तरतूद
बेस्टवरील खर्चाचा भार कमी करण्यासाठी प्रत्येक वर्षी मुंबई महापालिका मदत करते. मात्र मनपाच्या बजेटमध्ये तीन टक्के वाहतुकीसाठी राखीव तरतूद केली तर याचा बेस्टला फायदा होईल, असेही मुख्यमंत्र्यांनी सांगितले.
छोट्या गाड्यांचा प्रस्ताव तयार करा - शिंदे
फेरीवाल्यांमुळे रस्ते अरूंद होत आहेत. नागरिकांच्या सोयीसाठी मेट्रो स्टेशन आणि बेस्ट बसच्या मार्गाचे नियोजन करावे. यासाठी छोट्या अत्याधुनिक बसचा प्रस्ताव तयार करावा. नागरिकांच्या करानुसार सोयीसुविधा पुरविण्याच्या सूचना उपमुख्यमंत्री एकनाथ शिंदे यांनी दिल्या.
बेस्ट बसची माहिती कळणार
प्रवाशांना सध्या बस कुठे आहे, किती वेळात येईल, यानुसार प्रवासाचे नियोजन करण्यासाठी जीपीएस सिस्टीमचा उपयोग होणार आहे. यासाठी बेस्ट गुगलशी करार करणार असल्याची माहिती यावेळी देण्यात आली.
एकूण बस २,७८३, इलेक्ट्रिक बस ८७५
लोकसंख्येच्या तुलनेत सात हजार बसची गरज
२०२७ पर्यंत सर्व बस इलेक्ट्रिक करण्याचा बेस्टचा मानस
