मुंबई : वैद्यकीय प्रवेशाच्या गट ‘ब’ अभ्यासक्रमांच्या तिसऱ्या फेरीच्या निकालांची घोषणा २०२५-२६ शैक्षणिक वर्षाच्या वैद्यकीय प्रवेशाच्या गट ‘अ’ अभ्यासक्रमांच्या तिसऱ्या फेरीच्या निकालांपूर्वीच करण्यात आली आहे. यावर उच्च न्यायालयात आक्षेप घेण्यात आला आहे. याप्रकरणी राज्य सरकार, वैद्यकीय शिक्षण आणि संशोधन संचालनालय तसेच राज्य सामायिक प्रवेश परीक्षा कक्षाविरुद्ध याचिका दाखल करण्यात आली आहे.
वैद्यकीय प्रवेश घेऊ इच्छिणारी पुण्यातील विद्यार्थिनी पूर्वा वाघ हिने यासंदर्भात उच्च न्यायालयात दाद मागितली आहे. वैद्यकीय प्रवेश अभ्यासक्रमांच्या निकालाच्या घोषणेत मोठा घोळ घालण्यात आला असून त्याचा फटका बसून मला वैद्यकीय प्रवेशाची संधी गमावावी लागली आहे, असा दावा याचिकाकर्त्या विद्यार्थिनीने केला आहे.
पूर्वा वाघ हिने वकील राहुल कामेरकर यांच्यामार्फत न्यायालयात याचिका दाखल केली आहे. तिला गट ‘अ’ अभ्यासक्रमांच्या निकालात प्रवेश मिळाला आहे. तथापि, गट ‘अ’ अभ्यासक्रमांच्या तिसऱ्या फेरीचा निकाल गट ‘अ’ निकालापूर्वी जाहीर करण्यात आल्याने पुढील फेरीत सहभागी होण्यास मनाई केली गेली आहे, याकडे न्यायालयाचे लक्ष वेधण्यात आले.
याप्रकरणी न्या. मंजुषा देशपांडे यांच्या सुट्टीकालीन खंडपीठापुढे सुनावणी झाली. न्यायालयाने याचिकेची गंभीर दखल घेतली आणि सर्व प्रतिवादींना नोटीस बजावली. तिसऱ्या फेरीतील प्रवेश आधीच पूर्ण झाल्याची माहिती सीईटी सेलच्या वकिलांनी न्यायालयाला माहिती दिली. त्याची नोंद घेत न्यायालयाने पुढील सुनावणी सोमवारी निश्चित केली.
सर्वसाधारणपणे गट ‘अ’चे निकाल गट ‘ब’ च्या आधी जाहीर केले जातात. परिणामी, एमबीबीएस/बीडीएस अभ्यासक्रमात प्रवेश न मिळालेले उमेदवार बीएएमएस/बीएचएमएस/बीएसएमएसचा पर्याय निवडू शकतात.
गट ‘अ’ आणि ‘ब’ च्या निकालाच्या क्रमात बदल झाल्यामुळे गट ‘अ’ चा निकाल जाहीर झाल्यानंतर ज्या उमेदवारांची नावे गट ‘ब’ मध्ये आली होती आणि त्यांना चांगले महाविद्यालये मिळाली होती, त्यांनी गट 'अ'चा निकाल जाहीर झाल्यानंतर गट 'ब'मधील त्यांच्या जागा सोडून दिल्या आहेत आणि गट 'अ'च्या जागांसाठी निवड केली आहे. अशा उमेदवारांना ज्या जागा देण्यात आल्या होत्या, त्या आता 'स्ट्रे राऊंड'मध्ये दिल्या जाणार आहेत.
