मुंबई : रूळांची दुरुस्ती, ओव्हरहेड वायर, सिंगल यंत्रणेची दुरुस्ती अशा विविध कामांसाठी रविवार १९ नोव्हेंबर रोजी मध्य, हार्बर रेल्वेमार्गावर मेगाब्लॉक घेण्यात आला आहे. या कालावधीत तिन्ही मार्गावरील काही लोकल उशिराने धावणार असून काही लोकल रद्द करण्यात आल्याचे मुंबई उपनगरीय रेल्वे प्रशासनाकडून सांगण्यात आले. दरम्यान, पश्चिम रेल्वे मार्गावर रविवारी मेगाब्लॉक रद्द करण्यात आल्याची माहिती पश्चिम रेल्वे प्रशासनाकडून देण्यात आली.
मध्य रेल्वेच्या छत्रपती शिवाजी महाराज टर्मिनस-विद्याविहार स्थानकादरम्यान धीम्या मार्गावर सकाळी १०.५५ ते दुपारी ३.५५ या कालावधीत दुरुस्तीचे काम हाती घेतले आहे. या कालावधीत सीएसएमटी स्थानकातून सुटणाऱ्या डाऊन धीम्या मार्गावरील लोकल सीएसएमटी-विद्याविहार स्थानकांदरम्यान डाऊन जलद मार्गावर वळवण्यात आल्या आहेत. या लोकल भायखळा, परळ, दादर, माटुंगा, शीव आणि कुर्ला स्थानकांवर थांबतील आणि पुढे डाऊन मार्गावर वळवण्यात येतील. तर घाटकोपर स्थानकातून सुटणाऱ्या अप धीम्या मार्गावरील लोकल विद्याविहार-सीएसएमटी दरम्यान अप जलद मार्गावर वळवण्यात आल्या असून कुर्ला, शीव, माटुंगा, दादर, परळ आणि भायखळा स्थानकात थांबतील.
हार्बर मार्गावर छत्रपती शिवाजी महाराज टर्मिनस ते चुनाभट्टी, वांद्रे मार्गावर सकाळी ११.४० ते दुपारी ४.४० पर्यंत आणि चुनाभट्टी-वांद्रे-सीएसएमटी अप हार्बर मार्गावर सकाळी ११.१० ते दुपारी ४.१० पर्यंत हा ब्लॉक आहे. त्यामुळे सीएसएमटी-वडाळा रोड स्थानकातून वाशी, बेलापूर, पनवेलला जाणाऱ्या डाऊन हार्बर मार्गावरील लोकल आणि छत्रपती शिवाजी महाराज टर्मिनस स्थानकातून वांद्रे, गोरेगाव स्थानकात जाणाऱ्या डाऊन हार्बर मार्गावरील लोकल रद्द करण्यात आल्या आहेत. तर पनवेल, बेलापूर, वाशी स्थानकातून सीएसएमटीला जाणाऱ्या अप हार्बर मार्गावरील सेवा आणि गोरेगाव, वांद्रे स्थानकातून छत्रपती शिवाजी महाराज टर्मिनससाठी अप हार्बर मार्गावरील लोकल दुरुस्तीच्या कालावधीत रद्द करण्यात आल्या आहेत.
पनवेल - कुर्ला विशेष लोकल
ब्लॉक कालावधीत पनवेल ते कुर्ला (प्लॅटफॉर्म क्रमांक ८) या स्थानकांदरम्यान विशेष सेवा चालवण्यात येत आहेत. तसेच ब्लॉक कालावधीत सकाळी १० ते संध्याकाळी ६ वाजेपर्यंत मुख्य मार्ग आणि पश्चिम रेल्वेवरून प्रवास करण्याची परवानगी देण्यात आली आहे.
