मुंबई : मुंबई महानगर क्षेत्र (एमएमआर) २०२५ मध्ये देशातील सर्वोत्कृष्ट कामगिरी करणारा निवासी रिअल इस्टेट बाजार ठरला आहे. प्रीमियम तसेच मध्यम-आय गटातील घरांना वर्षभर सातत्याने मजबूत मागणी मिळाल्याने या क्षेत्राला मोठी चालना मिळाली, असे क्रेडाई-लायसेस फोरासच्या ताज्या अहवालात नमूद करण्यात आले आहे.
अहवालानुसार, ग्रेटर मुंबईने या वाढीत महत्त्वाची भूमिका बजावत देशातील सर्वाधिक निवासी विक्री मूल्य १,३३,००५ कोटी रुपये इतके नोंदवले. २ कोटी रुपये ते ५ कोटी रुपये या उच्च-मूल्य श्रेणीतील घरांनी एकूण विक्रीत सर्वाधिक वाटा उचलला, ज्यातून प्रीमियम हाउसिंगची वाढती मागणी अधोरेखित होते.
पुरवठा ट्रेंड्सकडे पाहता, १ कोटी रुपये ते ५ कोटी रुपये किमतीतील २बीएचके घरांना मोठी मागणी असून, १बीएचके युनिट्सची मागणी ५० लाख रुपये ते २ कोटी रुपये या श्रेणीत केंद्रित असल्याचे दिसून येते.
ग्रेटर मुंबईच्या बाजारात सध्या १,५८१ बिल्डर्सद्वारे विकसित २,६६३ प्रोजेक्ट्स असून, २० महिन्यांचा इन्व्हेंटरी उपलब्ध आहे. यामुळे मागणी आणि पुरवठ्यात स्थिर पण विकसित होत असलेले संतुलन दिसून येत आहे. किंमतींच्या दृष्टीने, २०२५ मध्ये एमएमआरमध्ये वाढ स्थिर राहिली. ग्रेटर मुंबईत हाऊसिंग प्राइस इंडेक्स ३.४ टक्के नोंदवण्यात आला, जो मजबूत आर्थिक पाया आणि सातत्यपूर्ण मागणीचे द्योतक आहे. दरम्यान, एमएमआरमधील ठाणे आणि नवी मुंबई हे भाग क्षेत्रीय विस्ताराचे प्रमुख केंद्र म्हणून पुढे येत आहेत. सुधारित कनेक्टिव्हिटी आणि पायाभूत सुविधांमुळे २०२५ मध्ये या दोन्ही बाजारांत एचपीआय ४.५ टक्के नोंदवला गेला. वसई-विरार आणि मीरा-भायंदरसारख्या परिघीय भागांतही स्थिर मागणी कायम आहे. २०२५ मध्ये या बाजारांत एचपीआय २.१ टक्के नोंदवला गेला असून परवडणाऱ्या आणि मध्यम-आय गटातील घरांकडे खरेदीदारांचा कल आहे.
ठाण्यात उच्च-मध्यम, तर नवी मुंबईत प्रीमियममध्ये मागणी
ठाण्यात उच्च-मध्यम-आय आणि प्रीमियम सेगमेंटमध्ये मागणी मजबूत राहिली, तर नवी मुंबईत मध्यम-आय आणि उभरत्या प्रीमियम सेगमेंटमध्ये संतुलित मागणी दिसून आली. कल्याण-डोंबिवली हा भागही उपनगरीय हब म्हणून वेगाने विकसित होत असून, २०२५ मध्ये येथे एचपीआय ३.० टक्क्यांपर्यंत पोहोचला. परवडणाऱ्या किमती आणि सुधारित पायाभूत सुविधांमुळे या भागात ७५ लाखांपर्यंतच्या घरांना विशेष मागणी आहे.
