पालघर : मुंबई-अहमदाबाद महामार्गावर वाडा खडकोना गावाच्या हद्दीत शनिवारी सकाळी झालेल्या भीषण अपघातात कार मधील एकाच कुटुंबातील तिघांचा मृत्यू झाला, तर दोन जण गंभीर जखमी झाले आहेत. सकाळी साडेअकरा वाजण्याच्या सुमारास मेंढवण खिंडीच्या उतारावर मनोर गेट हॉटेलसमोर हा अपघात झाला.
एक भरधाव कार शनिवारी सकाळी मुंबईच्या दिशेने जात असताना मेंढवन खिंडीच्या उतारावर मनोर गेट हॉटेलसमोर पोहोचली. या ठिकाणी सिमेंट काँक्रीटच्या रस्त्यावर सफेद पट्टे मारण्याचे काम सुरू असल्यामुळे एक मार्गिका बंद करण्यात आली होती. याचवेळी समोर असणाऱ्या एका वाहनाने आपत्कालीन ब्रेक दाबल्याने भरधाव कारचालकाचे नियंत्रण सुटले आणि ही कार त्या वाहनाला जाऊन धडकली. त्यानंतर कारच्या पाठीमागे असलेल्या सिमेंट वाहतूक करणाऱ्या ट्रकने कारला धडक दिली. त्यात कारमधील तिघांचा जागीच मृत्यू झाला, तर दोन जण गंभीर जखमी झाले.
क्लेटन वेल्स (४२), फॅबिओला वेल्स (४५), ग्लोरिया वेल्स (७३) अशी तिघांची नावे असून रेडन वेल्स (९), हेनान वेल्स (६३) या जखमींना उपचारासाठी खाजगी रुग्णालयात दाखल करण्यात आले आहे.
