मुंबई : मुंबईतील विशेषतः गोवंडी मानखुर्द शिवाजीनगर या भागातील १४ फूट आणि त्यापेक्षा उंच झोपड्यांवरील कारवाईला सर्वपक्षीयांकडून विरोध होत आहे. मात्र मुंबई महापालिका आपल्या निर्णयावर ठाम असून नियमीत कारवाई अंतर्गत आणि उच्च न्यायालयाच्या आदेशानुसार झोपड्यांवर कारवाई करणार असल्याचे पालिकेतील वरिष्ठ अधिकाऱ्याने सांगितले.
मुंबई शहर आणि उपनगरांत एकूण २ लाख २३ हजार १५० झोपड्या असून त्यापैकी ३९ हजार १११ झोपड्या १४ फूट किंवा त्यापेक्षा अधिक उंचीच्या असल्याचे महापालिकेच्या पाहणीत आढळले आहे. यामध्ये शहरातील ३ हजार ३४८, पश्चिम उपनगरातील ४ हजार ५३६ आणि पूर्व उपनगरातील तब्बल ३१ हजार २२७ झोपड्यांचा समावेश आहे. यापैकी ४ हजार ५८४ झोपड्यांवर यापूर्वी निष्कासनाची कारवाई, तर ६११ झोपड्यांना नोटिसा बजावण्यात आल्या आहेत. उर्वरित अनधिकृत बांधकामे स्वतःहून हटवावीत, अन्यथा कारवाई करण्यात येईल, असे प्रशासनाने स्पष्ट केले आहे.
या कारवाईला भाजप, शिवसेना (उबाठा), काँग्रेससह विविध पक्षांनी विरोध केला आहे. रहिवाशांचे पुनर्वसन, सर्वेक्षण आणि पर्यायी व्यवस्था याबाबतही प्रश्न उपस्थित करण्यात आले आहेत. वॉर्डस्तरावरील अधिकाऱ्यांना कारवाई थांबविण्याचे कोणतेही आदेश देण्यात आले नसल्याचे अधिकाऱ्याने सांगितले.
