मुंबई : मुंबई महापालिका मुख्यालयातील सभागृहातील आवाज खणखणीत होणार आहे. सभागृहातील ध्वनियंत्रणा अधिक सक्षम करण्यासाठी प्रत्येक नगरसेवकाच्या टेबलावर स्वतंत्र वायरलेस माइक बसविण्यात येणार असून, यासाठी सुमारे १ कोटी १४ लाख ८७ हजार रुपये खर्च करण्यात येणार आहे. सप्टेंबर महिन्यापासून होणाऱ्या सभागृहाच्या बैठकीत ही नवी व्यवस्था कार्यान्वित होण्याची शक्यता आहे.
महापालिकेच्या मुख्यालयातील ऐतिहासिक सभागृहात सन २००२ मधील आगीनंतर नूतनीकरण करण्यात आले होते. त्यावेळी बसविण्यात आलेली ध्वनी व्यवस्था कालबाह्य झाल्याने ती बदलण्याची गरज निर्माण झाली होती. फेब्रुवारी २०२६ मध्ये नव्याने निवडून आलेल्या नगरसेवकांनी सभागृहात बोलताना आवाज स्पष्टपणे पोहोचत नसल्याची तक्रार केल्यानंतर सभागृह नेते गणेश खणकर यांनी ध्वनी व्यवस्था बदलण्यासाठी पाठपुरावा केला.
