मुंबई : मांसाहारी अन्नामुळे एखाद्या 'कठोर शाकाहारी' व्यक्तीच्या धार्मिक भावना दुखावतात, तर त्या व्यक्तीने अशा हॉटेलमधून अन्न का मागवावे जेथे शाकाहारी आणि मांसाहारी दोन्ही प्रकारची सेवा दिली जाते, असा सवाल मुंबई उपनगर ग्राहक तक्रार निवारण आयोगाने एका निर्णयात उपस्थित केला आहे.
“विवेकी व्यक्ती शाकाहारी आणि मांसाहारी अन्नात फरक करू शकते, हे स्वाभाविक वाटते,” असे मुंबई उपनगर (अतिरिक्त) जिल्हा ग्राहक तक्रार निवारण आयोगाने नुकत्याच दिलेल्या आदेशात म्हटले आहे.
आयोगाने एका उपाहारगृहाविरोधात दोन व्यक्तींनी केलेली तक्रार फेटाळली. तक्रारदारांनी त्यांना चुकीने मांसाहारी अन्न देण्यात आल्याचा आरोप केला होता.
“जर तक्रारदार व्यक्ती खरंच कठोर शाकाहारी असतील आणि मांसाहारी अन्न त्यांच्या धार्मिक भावनांना धक्का देत असेल, तर त्यांनी केवळ शाकाहारी अन्न देणाऱ्या हॉटेलमधूनच का अन्न मागवले नाही? दोन्ही प्रकारचे अन्न पुरवणाऱ्या रेस्टॉरंटमधून का मागवले?” असा सवाल आयोगाने उपस्थित केला.
तक्रारदारांनी असेही म्हटले की, स्टाफने त्यांच्या सूचनांकडे दुर्लक्ष केले आणि आउटलेटवरील फलकावर शाकाहारी किंवा मांसाहारी पर्याय स्पष्टपणे दर्शवले नव्हते.
तक्रारदारांच्या वागणुकीनंतरही, कंपनीने १,२०० रुपयांचे गिफ्ट व्हाउचर दिले, पण तक्रारदारांनी प्रत्येकी ३ लाख रुपयांची मागणी केली, असे कंपनीने सांगितले.
आयोगाने निरीक्षण केले की, तक्रारदारांनी मांसाहारी मोमोजची ऑर्डर दिल्याचे बिलावरून स्पष्ट होते. जरी मेनू बोर्डाच्या फोटोत त्या कॉम्बोमध्ये मांसाहारी की शाकाहारी आहे हे स्पष्टपणे लिहिलेले नसले, तरी खाली “व्हेज/नॉन व्हेज” अशी नोंद आहे, यावर आयोगाने लक्ष वेधले – याचा अर्थ दोन्ही पर्याय उपलब्ध होते.
तसेच, तक्रारदारांनी धार्मिक विधी किंवा समारंभ प्रभावित झाल्याचे कोणतेही स्पष्ट पुरावे सादर केलेले नाहीत, असे आयोगाने म्हटले.
“कंपनीकडून कोणतीही सेवा त्रुटी सिद्ध करण्यात तक्रारदार अपयशी ठरले आहेत,” असा निकाल आयोगाने दिला.
तक्रारदारांचे आरोप
तक्रारदारांनुसार, त्यांनी १९ डिसेंबर २०२० रोजी मुंबईच्या सायन येथील ‘वॉव मोमोज’आऊटलेटमधून स्टीम्ड दार्जिलिंग मोमोज कॉम्बो आणि सॉफ्ट ड्रिंक मागवले होते. त्यांनी दोनदा आपली शाकाहारी पसंती स्पष्ट करूनही त्यांना स्टीम्ड चिकन दार्जिलिंग मोमोज मिळाले, असा आरोप त्यांनी केला. तक्रारदारांनी मानसिक त्रास, भावनिक वेदना आणि धार्मिक भावना दुखावल्याचा दावा करत ६ लाख रुपयांची भरपाई मागितली होती.
कंपनीचा दावा
दुसरीकडे, कंपनीने दावा केला की, तक्रारदारांनी स्वतः मांसाहारी मोमोजची ऑर्डर दिली होती, हे बिलावरून स्पष्ट होते. तक्रारदारांनी त्यांच्या कर्मचाऱ्याशी गैरवर्तन केले आणि गोंधळ निर्माण केला, त्यामुळे त्यांनी ऑर्डर परत करत मोफत अन्न दिले. ऑर्डर परत केल्यामुळे तक्रारदार ग्राहक कायद्यान्वये 'ग्राहक' म्हणून पात्र नाहीत, असा दावा कंपनीने केला.
