पूनम अपरांज/मुंबई :
मुंबई पोलिसांच्या आर्थिक गुन्हे शाखेने (ईओडब्ल्यू) जम्बो कोविड सेंटर कंत्राटातील कथित गैरव्यवहारप्रकरणी एस्प्लानेड न्यायालयात ५०० पानांचे दोषारोपपत्र सादर केले आहे. हे दोषारोपपत्र 'मेसर्स ओक्स मॅनेजमेंट कन्सलटन्सी प्रायव्हेट लिमिटेड' आणि राहुल गोम्स यांच्या विरोधात दाखल करण्यात आले असून, यात ८ साक्षीदारांच्या जबाबांचा समावेश असल्याचे अधिकाऱ्यांनी सांगितले.
या प्रकरणाच्या तपासात सिडकोचे निवृत्त अधिकारी राजेंद्र घायाडकर यांचेही नाव आरोपी म्हणून समोर आले आहे. मात्र, त्यांच्यावर खटला चालवण्यासाठी आर्थिक गुन्हे शाखेने 'भारतीय नागरिक सुरक्षा संहिता' (बीएनएसएस) च्या कलम १९७ अन्वये अनिवार्य मंजुरी मागितली आहे. घायाडकर यांच्याविरुद्ध दोषारोपपत्र दाखल करण्यापूर्वी या प्रस्तावाला मंजुरी मिळावी यासाठी तो सिडकोच्या मुख्य कार्यकारी अधिकाऱ्यांकडे पाठवण्यात आला आहे.
कोविड काळात राहुल गोम्स यांनी दोन बनावट कंपन्यांच्या नावावर 'सिडको' कडून परवानग्या मिळवल्याचा आरोप करत आर्थिक गुन्हे शाखेने यापूर्वी नवा गुन्हा दाखल केला होता. या संपूर्ण प्रकरणाचा पुढील तपास सध्या सुरू असल्याची माहिती तपास अधिकाऱ्यांनी दिली आहे.
