मुंबई : मुंबई महानगरपालिकेच्या हद्दीत तात्पुरत्या स्वरूपात जाहिराती प्रसिद्ध करण्यासाठी जागा उपलब्ध करून देण्यात आली आहे. तरी काही संस्था, संघटना व व्यावसायिकांकडून रस्त्यांच्या दुतर्फा असलेल्या विजेच्या खांबांवर अनधिकृतपणे बॅनर्स लावण्यात येत आहेत. अशा संस्था, संघटना व व्यावसायिकांविरोधात अनुज्ञापन खात्याकडून गावदेवी, मलबार हिल, डॉ. डी. बी. मार्ग पोलीस ठाण्यात अनोळखी व्यक्तीविरोधात गुन्हा दाखल करण्यात आला आहे.
मुंबई पालिकेने गेल्या दोन दिवसांत बेकायदेशीर बॅनर्सविरोधात जोरदार कारवाईला सुरुवात केली आहे. या कारवाईत एकूण ४१ बॅनर्स निष्कासित करण्यात आले. पालिकेने मंजुरी दिलेल्या ठिकाणीच परवानगी घेऊन जाहिराती प्रदर्शित कराव्यात, असे आवाहनही महानगरपालिकेच्या अनुज्ञापन खात्याने केले आहे तसेच या पुढेही सार्वजनिक ठिकाणी विनापरवाना बॅनर्स, फलक, पोस्टर्स लावणाऱ्यांविरोधात कठोर कारवाई सुरू राहणार असल्याचे महानगरपालिकेकडून स्पष्ट करण्यात येत आहे. पालिका उपायुक्त चंदा जाधव मार्गदर्शनाखाली अनुज्ञापन खात्याकडून ही कारवाई करण्यात आली. पालिकेच्या डी विभागातील पेडर रोड, पंडिता रमाबाई मार्ग, भुलाभाई देसाई मार्ग, वाळकेश्वर, मलबार हिल, डॉ. दादासाहेब भडकमकर मार्ग, मौलाना शौकत अली मार्ग, सरदार वल्लभभाई पटेल मार्ग तसेच राजा राममोहन रॉय मार्ग या ठिकाणी अनुज्ञापन खात्याकडून निष्कासन कारवाई करण्यात आली.
पालिका कायद्यानुसार कारवाई
अशा प्रकारच्या विनापरवानगी जाहिरात फलक, बॅनर, पोस्टर लावणाऱ्या व्यक्ती किंवा संस्थेविरोधात ‘महाराष्ट्र मालमत्ता विद्रुपीकरण प्रतिबंधक कायदा-१९९५’ मधील तरतुदी तसेच ‘मुंबई महापालिका अधिनियम १८८८’नुसार कायदेशीर कारवाई करण्याची तरतूद आहे. या तरतुदींचा भंग करताना आढळल्यास संबंधितांवर गुन्हा दाखल करणे तसेच न्यायालयीन दावा दाखल करणे या कायदेशीर कारवाईंचा समावेश असल्याची माहिती परवाना विभागाने दिली आहे.
टोल फ्री क्रमांकावर तक्रार करा!
विनापरवाना आणि अनधिकृत जाहिरात फलक (होर्डिंग) तसेच बॅनरविरोधात तक्रार नोंदवण्यासाठी नागरिकांनी १९१६ या टोल फ्री क्रमांकावर संपर्क साधावा, असे आवाहन महापालिकेने केले आहे. विनापरवाना प्रदर्शित केलेल्या जाहिरात फलकांविरोधात तक्रार नोंदवण्याची सुविधा महापालिकेच्या अधिकृत संकेतस्थळावर www.mcgm.gov.in आणि @mybmc या सोशल मीडियावरही उपलब्ध आहे.
न्यायालयाचे निर्देश
सार्वजनिक ठिकाणी विनापरवाना कोणतेही फलक, बॅनर्स, पोस्टर प्रदर्शित करण्याला मनाई आहे. जाहिरात फलक (होर्डिंग), बॅनर किंवा पोस्टर लावण्यास प्रतिबंध आहे, असे निर्देश मुंबई उच्च न्यायालयाने दिले आहेत.
