मुंबई : छत्रपती शिवाजी महाराज टर्मिनस येथे बुधवारी दुपारी मध्य रेल्वेची एक कसारा लोकल चुकीच्या प्लॅटफॉर्मवर गेल्याने प्रवाशांमध्ये प्रचंड गोंधळ उडाला आणि रेल्वेच्या कारभारावर पुन्हा एकदा प्रश्नचिन्ह उपस्थित झाले. नेहमीप्रमाणे प्लॅटफॉर्म क्रमांक ६ वर येणारी ही उपनगरीय लोकल अचानक लांब पल्ल्याच्या मेल आणि एक्सप्रेस गाड्यांसाठी राखीव असलेल्या प्लॅटफॉर्म क्रमांक ९ वर वळवण्यात आली. या अनपेक्षित बदलामुळे प्रवाशांची मोठी धावपळ झाली आणि स्थानकावर उद्घोषणा झाल्यानंतर प्रवाशांनी एका प्लॅटफॉर्मवरून दुसऱ्या प्लॅटफॉर्मकडे धाव घेतली.
या धक्कादायक घटनेला दुजोरा देताना मध्य रेल्वेचे मुख्य जनसंपर्क अधिकारी डॉ. स्वप्नील निला यांनी प्रवाशांच्या सुरक्षेला कोणताही धोका निर्माण झाला नसल्याचे सांगितले. रेल्वे प्रशासनाने प्रवाशांना वेळेत प्लॅटफॉर्म बदलाची माहिती दिली आणि टिटवाळ्याच्या दिशेने परत जाणाऱ्या प्रवाशांना योग्य ती मदत करण्यात आली. सर्व प्रवासी ट्रेनमध्ये चढल्यानंतरच परतीचा प्रवास सुरू करण्यात आल्याचे त्यांनी स्पष्ट केले.
नेमके काय घडले ?
कसाराहून सकाळी १०.१८ वाजता सुटणारी सीएसएमटी लोकल सीएसएमटी स्थानकात दुपारी १ च्या सुमारास फलाट क्रमांक ६ वर येणे अपेक्षित होते. मात्र ही लोकल अचानकपणे फलाट क्रमांक नऊवर पोहचली. ही लोकल फलाट क्रमांक ६ वरून दुपारी १२.४४ वाजता सीएसएमटी-टिटवाळा जलद लोकल म्हणून जाणार होती. त्यामुळे अनेक प्रवासी फलाट क्रमांक ६ वर उभे होते. मात्र लोकल फलाट क्रमांक ९ वर आल्याचे समजताच प्रवाशांचा गोंधळ उडाला. यामुळे प्रवाशांची पळापळ झाली. सीएसएमटी स्थानकावरील फलाट क्रमांक १ ते ७ हे उपनगरीय लोकल सेवांसाठी राखीव आहेत. तर फलाट क्रमांक ८ ते १८ वरून मेल आणि एक्स्प्रेस चालविण्यात येतात. मात्र पहिल्यांदाच फलाट क्रमांक ९ वर लोकल गेल्याचा प्रकार घडला. या घटनेचे कारण प्रशासनाकडून स्पष्ट करण्यात आले नाही.
लोकल ट्रेनला 'मेल' समजले
दुसरीकडे, रेल्वेच्या एका अंतर्गत सूत्राने नाव न सांगण्याच्या अटीवर माहिती दिली की, मार्गाची रचना करणाऱ्या कर्मचाऱ्याने लोकल ट्रेनला चुकून मेल ट्रेन समजले आणि त्यामुळे हा मार्ग प्लॅटफॉर्म क्रमांक ९ कडे मोकळा करण्यात आला. या चुकीमुळे सुरक्षेचा कोणताही प्रश्न निर्माण झाला नसला तरी, सीएसएमटीसारख्या अतिशय व्यस्त टर्मिनसवर झालेली ही छोटीशी तांत्रिक चूक काही मिनिटांत हजारो प्रवाशांसाठी मनस्ताप ठरू शकते, हे पुन्हा एकदा सिद्ध झाले आहे.
